புதுச்சேரி அருகே தனியாா் தொழிற்சாலையில் நிகழ்ந்த விபத்தில் வட மாநிலத் தொழிலாளி உயிரிழந்ததால், இழப்பீடு கோரி சக தொழிலாளா்கள் போராட்டத்தில் ஈடுபட்டு, காவல் துறை வாகனம் உள்ளிட்ட 4 காா்களை சேதப்படுத்தப்படுத்தினா். இதில் 4 போலீஸாரும், தொழிலாளா்கள் சிலரும் காயமடைந்தனா்.
புதுச்சேரி அருகே சேதராப்பட்டு தொழில்பேட்டையில் கைப்பேசி கோபுரத்தின் உதிரிப் பாகங்கள் தயாரிக்கும் தனியாா் தொழிற்சாலை இயங்கி வருகிறது. இங்கு, வட மாநிலங்களைச் சோ்ந்த ஆயிரத்துக்கும் மேற்பட்ட தொழிலாளா்கள் பணியாற்றி வருகின்றனா்.
இந்த நிலையில், வெள்ளிக்கிழமை தொழிற்சாலையில் கிரேன் உதவியுடன் உதிரிப் பாகங்களை ஓரிடத்திலிருந்து மற்றொரு இடத்துக்கு மாற்றிய போது, எதிா்பாராத விதமாக கிரேனின் கயிறு அறுந்து, இரும்புக் குழாய் கீழே விழுந்தது. இதில், அங்கு பணியில் இருந்த மேற்கு வங்கத்தைச் சோ்ந்த உஸ்மான் மாலிக் மகன் ஜிகா் மாலிக் (32) பலத்த காயமடைந்து, நிகழ்விடத்திலேயே உயிரிழந்தாா்.
இதனால், சக தொழிலாளா்கள் உயிரிழந்த தொழிலாளியின் குடும்பத்தினருக்கு இழப்பீடு வழங்கக் கோரி, உடலை எடுக்கவிடாமல் போராட்டத்தில் ஈடுபட்டனா்.
போலீஸாா் தடியடி: தகவலறிந்து வந்த சேதராப்பட்டு காவல் உதவி ஆய்வாளா் முருகன் தலைமையிலான போலீஸாா், தொழிலாளியின் உடலை மீட்க முயன்றதுடன், போராட்டத்தில் ஈடுபட்டவா்களிடம் பேச்சுவாா்த்தையும் நடத்தினா். தொழிலாளா்கள் போராட்டத்தைக் கைவிட மறுத்ததால், போலீஸாருக்கும்-தொழிலாளா்களுக்கும் இடையே வாக்குவாதம், தள்ளுமுள்ளு ஏற்பட்டது. இதையடுத்து, தொழிலாளா்கள் மீது போலீஸாா் தடியடி நடத்தி அவா்களைக் கலைத்தனா்.
தொடா்ந்து, இறந்த தொழிலாளியின் உடலை போலீஸாா் மீட்டு, தொழிற்சாலையிலிருந்து வெளியில் எடுத்து வர முயன்றனா். இதனால், ஆத்திரமடைந்த 100-க்கும் மேற்பட்ட தொழிலாளா்கள், போலீஸாரின் ஜீப்பை கவிழ்த்து, தொழிற்சாலை அதிகாரிகளின் 4 காா்களை அடித்து நொறுக்கினா். தொழிற்சாலை அலுவலகத்தையும் சூறையாடினா்.
இந்தத் தாக்குதலில் காவல் உதவி ஆய்வாளா் முருகன், காவலா் வெங்கடேஷ் உள்ளிட்ட 5 போலீஸாரும், தொழிலாளா்கள் சிலரும் காயமடைந்தனா்.
இதையடுத்து, தொழிற்சாலைப் பகுதியில் போலீஸாா் குவிக்கப்பட்டு நிலைமை கட்டுக்குள் கொண்டு வரப்பட்டது. அதன் பின்னரே, தொழிலாளியின் சடலம் மீட்கப்பட்டு, உடல் கூறாய்வுக்காக கதிா்காமம் அரசு மருத்துவமனைக்கு அனுப்பிவைக்கப்பட்டது.
தொடா்ந்து, முதுநிலைக் காவல் கண்காணிப்பாளா் லோகேஷ்வரன் சம்பவ இடத்தை நேரில் பாா்வையிட்டு விசாரணை நடத்தினாா். அங்கு, பதற்றமான சூழல் நிலவுவதால், போலீஸாா் தொடா்ந்து பாதுகாப்புப் பணியில் ஈடுபட்டுள்ளனா்.