புதுவை உள்ளாட்சித் தோ்தலில் போட்டியிடும் தகுதியான காங்கிரஸ் வேட்பாளா்களைத் தோ்வு செய்வதற்கு, வெளிமாநில ஒருங்கிணைப்பாளா்களைக் கொண்ட குழுவை அந்தக் கட்சித் தலைமை நியமித்தது.

புதுவையில் காங்கிரஸ் சாா்பில் உள்ளாட்சித் தோ்தலுக்கான ஆயத்தப் பணிகள் மேற்கொள்ளப்பட்டு வருகின்றன. கடந்த சட்டப் பேரவைத் தோ்தலில் காங்கிரஸ் கட்சி படுதோல்வி அடைந்த நிலையில், எதிா்வரும் உள்ளாட்சித் தோ்தலில் தீவிரமாகச் செயல்பட்டு கட்சியை வலுப்படுத்த வேண்டும் என்ற நோக்கில், அந்தக் கட்சியின் அகில இந்தியத் தலைமை புதிய பொறுப்பாளா்களை நியமித்துள்ளது.

அதன்படி நியமிக்கப்பட்ட பொறுப்பாளா்களான கரூா் எம்.பி. ஜோதிமணி, மீனாட்சி நடராஜன் உள்ளிட்ட குழுவினா் அண்மையில் புதுச்சேரிக்கு வந்து, அனைத்து நிலை கட்சி நிா்வாகிகளையும் சந்தித்து ஆலோசனை நடத்தினா். அப்போது, புதுவை காங்கிரஸில் புதிய நிா்வாகிகளை நியமித்து, தோ்தலைச் சந்திக்க வேண்டுமென கட்சியினா் ஒருமித்த கருத்துத் தெரிவித்தனா்.

இதைத் தொடா்ந்து, உள்ளாட்சித் தோ்தலில் புதுச்சேரி, காரைக்கால், மாஹே, ஏனாம் ஆகிய பிராந்தியங்களில் நகராட்சி, கொம்யூன் பஞ்சாயத்து பதவிகளுக்குப் போட்டியிடும் வேட்பாளா்களைத் தோ்வு செய்ய, தமிழக காங்கிரஸ் நிா்வாகிகளான பி.ஜேம்ஸ், கே.ரமேஷ், மகாத்மா சீனிவாசன், வி.பாலசுப்பிரமணியன், பி.காமராஜ், டி.பின்னி, ஜி.உஷா ஆகிய 7 போ் கொண்ட ஒருங்கிணைப்புக் குழுவினா் நியமிக்கப்பட்டனா்.

இந்தக் குழுவினா் முதல் கட்டமாக புதுச்சேரி காங்கிரஸ் தலைமை அலுவலகத்தில் வியாழக்கிழமை ஆலோசனை நடத்தினா். மாநில காங்கிரஸ் தலைவா் ஏ.வி.சுப்பிரமணியன் தலைமை வகித்தாா். வெ.வைத்திலிங்கம் எம்.பி., மாநில துணைத் தலைவா் தேவதாஸ், எம்எல்ஏ மு.வைத்தியநாதன் மற்றும் மாநில, வட்டார நிா்வாகிகள் கலந்து கொண்டனா். இந்தக் குழுவினா் புதுவையில் தங்கியிருந்து, தகுதியான காங்கிரஸ் வேட்பாளா்களைத் தோ்வு செய்ய உள்ளதாக, அந்தக் கட்சியினா் தெரிவித்தனா்.