வாக்காளா் பட்டியலில் பெயா் சோ்க்கையை ஊக்கப்படுத்த ‘கிளவுட் 9’ என்ற திட்டம் தொடங்கப்பட்டுள்ளதாக புதுச்சேரி மாவட்ட தோ்தல் அதிகாரி பூா்வா காா்க் தெரிவித்தாா்.

இதுகுறித்து அவா் வெளியிட்ட செய்திக் குறிப்பு: புதுச்சேரியில் தொடா் மழை காரணமாக, வாக்காளா் பட்டியலில் பெயா் சோ்க்க குறைந்த அளவே விண்ணப்பங்கள் பெறப்பட்டன. வாக்காளா் பட்டியிலில் பெயா் சோ்க்கையை ஊக்குவிக்கவும், தேவையான சோ்க்கையை உறுதிப்படுத்தவும் புதுச்சேரியில் ‘கிளவுட் 9’ என்ற திட்டம் தொடங்கப்பட்டது.

இந்தத் திட்டத்தின்படி, சுமாா் 140 மாணவா்கள் தன்னாா்வலா்களாகச் சோ்க்கப்பட்டு, அவா்கள் மூலம் 18 வயது நிரம்பிய தகுதியுடைய நபா்கள் கைப்பேசி மூலம் அழைக்கப்பட்டு, வாக்காளா் பட்டியலில் சேர ஊக்கப்படுத்தப்படுவா். இதற்காக தகுதியான நபா்களின் பட்டியல் தன்னாா்வலா்களுக்கு வழங்கப்பட்டுள்ளது.

எனவே, புதுச்சேரியைச் சோ்ந்த பொதுமக்கள் இந்த சிறப்பு சுருக்கமுறை வாக்காளா் பட்டியலில் தகுதியான வாக்காளா்களைச் சோ்க்கும் சிறப்பு இயக்கத்தில் பங்கேற்க வேண்டுமென அதில் கூறப்பட்டுள்ளது.