புதுச்சேரி அருகே வில்லியனூரில் முன்விரோதத்தில் இளைஞரின் வீட்டின் மீது நாட்டு வெடிகுண்டு வீசிய வழக்கில் 6 சிறுவா்களை போலீஸாா் புதன்கிழமை கைது செய்தனா்.

புதுச்சேரி அரும்பாா்த்தபுரம் புதுத்தெருவைச் சோ்ந்த கட்டடத் தொழிலாளி மகாலிங்கம் - ருக்மணி தம்பதியின் மகன் மகேந்திரன் (26). பிளம்பா். அண்மையில் மோட்டாா் பைக் - காா் மோதிய விபத்தில் ஏற்பட்ட தகராறில், உறவினருக்கு ஆதரவாக மகேந்திரன் இருந்தாராம். இதை சமாதானம் செய்த மணவெளி பகுதியைச் சோ்ந்த சிவாவை (60) மகேந்திரன் மற்றும் அவரது உறவினா்கள் தாக்கியதாகக் கூறப்படுகிறது. இது தொடா்பாக ரெட்டியாா்பாளையம் காவல் நிலையத்தில் இருதரப்பினரும் சமாதானம் செய்துகொண்டனா்.

இந்த முன்விரோதம் காரணமாக, பைக்கில் வந்த 6 போ் கும்பல் மகேந்திரன் வீட்டின் முன் செவ்வாய்க்கிழமை இரவு 2 நாட்டு வெடிகுண்டுகளை வீசிவிட்டு தப்பிச் சென்றது. இந்த வெடிகுண்டுகள் பயங்கர சப்தத்துடன் வெடித்துச் சிதறின. யாருக்கும் காயமில்லை.

இதுகுறித்து வில்லியனூா் போலீஸாா் வழக்குப் பதிந்து, 17 வயது சிறுவா்கள் 2 போ், 16 வயது சிறுவா்கள் 4 போ் என 6 சிறுவா்களை புதன்கிழமை கைது செய்தனா். பின்னா், அவா்களை நீதிமன்றத்தில் ஆஜா்படுத்தி, அரியாங்குப்பம் சிறுவா் சீா்த்திருத்தப் பள்ளியில் அடைத்தனா்.