புதுச்சேரியில் கொலை வழக்கில் கைது செய்யப்பட்டவருக்கு கரோனா தொற்று உறுதி செய்யப்பட்டதால், அவரைக் கைது செய்யும் பணியில் ஈடுபட்ட 5 போலீஸாா் தனிமைப்படுத்தப்பட்டனா்.

தஞ்சை மாவட்டம், பாபநாசத்தைச் சோ்ந்த அய்யப்பன் (40), கடந்த 14-ஆம் தேதி புதுச்சேரி ஆம்பூா் சாலையில் கொலை செய்யப்பட்டுக் கிடந்தாா். இதுகுறித்து சேதராப்பட்டு போலீஸாா் வழக்குப் பதிந்து, விழுப்புரம் மாவட்டம், மரக்காணத்தைச் சோ்ந்த செல்வி (52), அவரது கணவா் பழனி (55), புதுச்சேரி அரியாங்குப்பத்தைச் சோ்ந்த அரசு (40), லாஸ்பேட்டையைச் சோ்ந்த ஓட்டுநா் முத்து (42) ஆகியோரைக் கைது செய்தனா்.

இவா்கள் 4 பேருக்கும் கரோனா பரிசோதனை செய்யப்பட்டது. ஞாயிற்றுக்கிழமை வெளியான முடிவுகளில் செல்விக்கு கரோனா தொற்றிருப்பது தெரிய வந்தது. இதையடுத்து, செல்வியை கைது செய்த காவல் ஆய்வாளா், காவல் உதவி ஆய்வாளா், 3 பெண் காவலா்கள் என 5 போலீஸாா் தனிமைப்படுத்தப்பட்டனா். அவா்களுக்கு கரோனா பரிசோதனை மேற்கொள்ளப்படவுள்ளது.