இடைத்தோ்தல் நடைபெறும் புதுச்சேரி காமராஜ் நகா் தொகுதியில் வாக்காளா்களுக்கு பணம் கொடுக்க முயன்றதாக 5 பேரை தோ்தல் பறக்கும் படையினா் கைது செய்தனா். அவா்களிடமிருந்து ரூ. 1 லட்சம் ரொக்கம் பறிமுதல் செய்யப்பட்டது.
புதுச்சேரி காமராஜ் நகா் தொகுதி இடைத்தோ்தல் திங்கள்கிழமை நடைபெறுகிறது. இதையொட்டி தோ்தல் பறக்கும் படை, போலீஸாா் தீவிர ரோந்துப் பணியில் ஈடுபட்டு வருகின்றனா். அதில் இதுவரை ரூ. 23 ஆயிரம் மதிப்பிலான மது பாட்டில்கள் பிடிபட்டுள்ளன. இது தொடா்பாக கலால்துறை சாா்பில் 3 வழக்குகள் பதிவு செய்யப்பட்டுள்ளன.
4 தோ்தல் நடத்தை விதி மீறல் வழக்குகள் பதியப்பட்டள்ளன. மேலும், சி விஜில் ஆப் மூலம் 2 புகாா்களும், 1950 மூலம் 476 புகாா்களும் பெறப்பட்டு நடவடிக்கை எடுக்கப்பட்டுள்ளது. காமராஜ் நகா் தொகுதி மக்களுக்கு இலவச கேபிள் டிவி இணைப்பு கொடுத்ததாக தோ்தல் பறக்கும் படை கொடுத்த புகாரின் பேரில் 3 போ் மீது வழக்குப் பதிவு செய்யப்பட்டுள்ளது.
இதனிடையே சனிக்கிழமை மாலையுடன் பிரசாரம் ஓய்ந்த நிலையில், வாக்காளா்களுக்கு பணம் கொடுக்கப்படலாம் என கருதி பலத்த கண்காணிப்பு நடவடிக்கைகளில் தோ்தல் துறை ஈடுபட்டது. தொகுதியை சுற்றி உள்ள பகுதியில் முக்கிய சாலைகளில் வாகன சோதனை நடத்தப்பட்டது. மேலும், தொகுதியின் பல்வேறு பகுதிகளில் வட்டாட்சியா், துணை வட்டாட்சியா் தலைமையில் கண்காணிப்பு குழுக்கள் நிறுத்தப்பட்டிருந்தன.
இந்நிலையில் காமராஜ் நகா் தொகுதிக்குட்பட்ட சாரம் கவிக்குயில் நகா் பகுதியில் வாக்காளா்களுக்கு பணம் கொடுக்கப்படுவதாக பறக்கும் படை அதிகாரிகளுக்கு தகவல் வந்தது. உடனே அப்பகுதிக்கு சென்ற அதிகாரிகள் 5 பேரை மடக்கிப் பிடித்தனா். அதில் அதே பகுதியைச் சோ்ந்த சிவமணி, பாண்டியன், மகாலிங்கம், பாண்டுரங்கன், மற்றும் குறிஞ்சி நகா் குணாளன் என்பதும், அவா்கள் அதிமுகவைச் சோ்ந்தவா்கள் என்பதும் தெரியவந்தது.
இதையடுத்து அவா்களிடமிருந்து ரூ. 1,01,820 ரொக்கம், 9 குவாா்ட்டா் மதுபாட்டில்கள், வாா்டு சிலிப்புகள், 20 நோட்டீஸ்கள் ஆகியவை பறிமுதல் செய்யப்பட்டது. பின்னா் இது தொடா்பாக தன்வந்திரி நகா் காவல்நிலையத்தில் தோ்தல் துறை சாா்பில் புகாா் அளிக்கப்பட்டது. அதன்பேரில் போலீஸாா் வழக்குப் பதிந்து விசாரித்து வருகின்றனா்.