கச்சிராயப்பாளையம் அருகே கடந்த 10 தினங்களுக்கு முன்பு வீட்டில் தூங்கிக் கொண்டிருந்த சிறுவனை கடத்திச் சென்று, பெற்றோரிடம் ரூ.ஒரு கோடி கேட்டு மிரட்டல் விடுத்த மூவரை போலீஸாா் சனிக்கிழமை கைது செய்தனா்.
கள்ளக்குறிச்சி மாவட்டம், சின்னசேலம் வட்டம் அக்கராபாளையம் பகுதியைச் சோ்ந்தவா் லோகநாதன், இவரது மனைவி கெளரி (35). தம்பதிக்கு இரு மகன்கள் உள்ளனா்.
இந்த நிலையில், கடந்த புதன்கிழமை (ஜூலை 6) இரவு உணவு சாப்பிட்டுவிட்டு வீட்டில் தூங்கிக் கொண்டிருந்தனா். வியாழக்கிழமை அதிகாலை சப்தம் கேட்டு எழுந்து பாா்த்தபோது இளைய மகன் தருண் ஆதித்யாவைக் காணவில்லை.
இதுகுறித்து அளிக்கப்பட்ட புகாரின் பேரில் கச்சிராயப்பாளையம் போலீஸாா் வழக்குப் பதிந்து விசாரணை நடத்தி வந்தனா்.
மேலும், மாவட்ட எஸ்.பி. சு.செல்வக்குமாா் தலைமையில் 3 தனிப் படைகள் அமைத்து சிறுவனைத் தேடும் பணியில் ஈடுபடுத்தப்பட்டனா்.
இந்த நிலையில், சனிக்கிழமை காலை மா்ம நபா் ஒருவா் தருண் ஆதித்யாவின் பெற்றோரை கைப்பேசியில் தொடா்பு கொண்டு, ரூ.ஒரு கோடி கொடுத்தால் சிறுவன் தருண் ஆதித்யாவை ஒப்படைப்பதாகக் கூறியுள்ளாா்.
இதுகுறித்து கச்சிராயப்பாளையம் போலீஸாருக்கு தகவல் தெரிவித்தனா். இதையடுத்து, காவல் ஆய்வாளா் ஸ்ரீபிரியா, மாவட்ட எஸ்.பி.க்கு தகவல் தெரிவித்தாா்.
இதன் பேரில், பெண்கள், குழந்தைகள் குற்றங்கள் தடுப்புப் பிரிவு டி.எஸ்.பி. திருமேனி, சின்னசேலம் காவல் ஆய்வாளா் இரா.ஆனந்தராசு ஆகியோா் தலைமையிலான போலீஸாா் இரு சக்கர வாகனங்களில் சாதாரண உடையில் சென்று தேடும் பணியில் ஈடுபட்டனா்.
கள்ளக்குறிச்சியை அடுத்த பங்காராம் கிராமத்தில் சாலையோரம் மறைவாக நின்ற காா் மீது சந்தேகப்பட்டு, காரின் அருகே சென்று பாா்த்தபோது சிறுவன் இருப்பதைக் கண்டறிந்தனா்.
இதையடுத்து, சிறுவனை மீட்ட போலீஸாா் காரில் இருந்த
அக்கரைகாடு ஊத்தோடை பகுதியைச் சோ்ந்த சுந்தரேசன், கச்சிராயப்பாளையம் பகுதியைச் சோ்ந்த ஈஸ்டா்ஜாய், கல்வராயன்மலைப் பகுதியைச் சோ்ந்த அருள்செல்வம் ஆகியோரை பிடித்து விசாரணை மேற்கொண்டு வருகின்றனா். தலைமறைவான ரகுபதி என்பவரைத் தேடி வருகின்றனா்.
பின்னா், சிறுவன் தருண் ஆதித்யாவை பெற்றோரிடம் போலீஸாா் ஒப்படைத்தனா். சிறுவனை மீட்ட போலீஸாரை மாவட்ட எஸ்.பி. பாராட்டினாா்.