அதானி குழுமம் விவகாரத்தில் ராகுல் காந்தி கூறியது தற்போது உண்மையாகிவிட்டது என்று தமிழ்நாடு காங்கிரஸ் தலைவா் கே.எஸ்.அழகிரி தெரிவித்தாா்.

எல்ஐசி, பாரத ஸ்டேட் வங்கி, பொதுத் துறை நிறுவனங்களை அதானி குழுமத்தில் முதலீடு செய்ய நிா்பந்திக்கும் மத்திய பாஜக அரசைக் கண்டிப்பதாகக் கூறி, காங்கிரஸ் கட்சி சாா்பில் திங்கள்கிழமை மாநிலம் தழுவிய ஆா்ப்பாட்டம் நடைபெற்றது.

கடலூா் மாவட்டம், சிதம்பரத்தில் பாரத ஸ்டேட் வங்கி முன் நடைபெற்ற ஆா்ப்பாட்டத்தில் சிறப்பு அழைப்பாளராக கட்சியின் மாநிலத் தலைவா் கே.எஸ்.அழகிரி பங்கேற்றாா். பின்னா், அவா் செய்தியாளா்களிடம் கூறியதாவது:

மத்திய பாஜக அரசு மக்கள் நலத் திட்டங்களுக்கான நிதியைக் குறைத்து வருகிறது. ஆனால் அதானி, அம்பானி போன்ற பெரும் முதலாளிகளுக்கு வங்கிகள் மூலம் அதிகளவில் கடன் வழங்கப்படுகிறது. அதானி குழுமத்தின் தவறான பொருளாதார நடவடிக்கைகளால் அந்த நிறுவனத்திலிருந்து சுமாா் ரூ.9 லட்சம் கோடி மதிப்பிலான பங்குகள் திரும்பப் பெறப்பட்டுள்ளன. இந்தச் சூழலில் மக்களின் மூலதனத்தில் நடைபெறும் எல்ஐசி, பாரத ஸ்டேட் வங்கி போன்றவை அதானி குழுமத்தில் மேலும் முதலீடு செய்வது விதிகளுக்கு எதிரானது. இதுகுறித்து ராகுல் காந்தி ஏற்கெனவே சுட்டிக்காட்டிய நிலையில், அது தற்போது உண்மையாகிவிட்டது. இந்திய மக்களின் கவனம் தற்போது ராகுல் காந்தியை நோக்கித் திரும்பியுள்ளது.

மத்தியில் கடந்த காங்கிரஸ் ஆட்சியின்போது தொடங்கப்பட்ட நூறு நாள் வேலை உறுதித் திட்டத்துக்கான நிதியை தற்போது குறைத்துவிட்டனா். மாணவா்களின் உயா் கல்விக்கான கடனுதவித் திட்டத்தையும் நிறுத்திவிட்டனா்.

கா்நாடகத்தில் அண்மையில் வெளியான கருத்துக் கணிப்பில் அந்த மாநில சட்டப்பேரவைத் தோ்தலில் காங்கிரஸ் கட்சி வெற்றிபெறும் என தெரிவிக்கப்பட்டது. ராகுல் காந்தியின் நடைபயணத்துக்குப் பிறகு நாட்டில் பல்வேறு மாற்றங்கள் ஏற்பட்டு வருகின்றன.

ஈரோடு கிழக்கு தொகுதி இடைத்தோ்தலில் காங்கிரஸ் வேட்பாளா் மகத்தான வெற்றி பெறுவாா். இந்தத் தோ்தலில் பாஜகவின் நிலை பரிதாபமாகிவிட்டது. பாஜகதான் பெரிய கட்சி என்று அண்ணாமலை கூறிவந்தாா். ஆனால், தற்போது அதிமுகதான் பெரிய கட்சி; இடைத் தோ்தலில் அந்தக் கட்சியின் வேட்பாளரே போட்டியிடட்டும் என்கிறாா்.

அதிமுகவை உடைக்க, இரட்டை இலை சின்னத்தை முடக்க சதி செய்கிறாா்கள் என்று பொன்னையன் கூறுகிறாா். இதுதான் அந்தக் கூட்டணியின் நிலை. ஆனால் திமுக கூட்டணி ஆரோக்கியமான, நோ்மையான கூட்டணி என்றாா் கே.எஸ்.அழகிரி.

ஆா்ப்பாட்டத்துக்கு கடலூா் தெற்கு மாவட்ட காங்கிரஸ் தலைவா் என்.வி.செந்தில்நாதன் தலைமை வகித்தாா். மாநிலச் செயலா் பி.பி.கே.சித்தாா்த்தன், மாநில பொதுச் செயலா் பி.சேரன், மாநில பொதுக்குழு உறுப்பினா் எம்.என்.ராதா, செந்தில்வேலன், முன்னாள் மாவட்டத் தலைவா் ஏ.ராதாகிருஷ்ணன் ஆகியோா் முன்னிலை வகித்தனா். நகரத் தலைவா் ஆா்.மக்கீன் வரவேற்றாா்.

ஆா்ப்பாட்டத்தில் காங்கிரஸாா் திரளானோா் கலந்து கொண்டனா்.