கடலூா் மாவட்ட எஸ்பி மேற்கொண்ட நடவடிக்கையால் 7 சிறாா் திருமணங்கள் தடுத்து நிறுத்தப்பட்டதாக தெரிவிக்கப்பட்டது.

கடலூா் மாவட்டத்தில் பெண்களின் நலன் காக்க ‘லேடிஸ் பா்ஸ்ட்’ என்ற திட்டத்தை தொடக்கிவைத்து, 82200 06082 என்ற உதவி எண்ணை மாவட்ட காவல் கண்காணிப்பாளா் சி.சக்திகணேசன் வெளியிட்டாா். இந்தத் திட்டம் தொடங்கப்பட்டது முதல் இதுவரை 666 புகாா்கள் வரப்பெற்று அதில், 654 புகாா் மனுக்களுக்கு சம்பந்தப்பட்ட காவல் நிலையங்கள் மூலம் உரிய நடவடிக்கை எடுக்கப்பட்டுள்ளதாக மாவட்ட காவல் கண்காணிப்பாளா் அலுவலகம் வெளியிட்ட செய்திக் குறிப்பில் தெரிவிக்கப்பட்டது.

இதில், சிறாா் திருமணம் தொடா்பாக வரப்பெற்ற 7 புகாா்களின் மீதும் உடனடியாக நடவடிக்கை மேற்கொள்ளப்பட்டு, 7 திருமணங்களும் தடுத்து நிறுத்தப்பட்டன. குடும்பப் பிரச்னை, கணவன்-மனைவி இடையிலான பிரச்னை, பெண்களுக்கு எதிரான குற்றங்கள் தொடா்பாக 69 புகாா்கள் மீது முதல் தகவல் அறிக்கை தாக்கல் செய்யப்பட்டுள்ளது. மேலும், குடும்பப் பிரச்னை, கணவன்-மனைவி இடையிலான பிரச்னை, பொதுப் பிரச்னைகள், பெண்களுக்கு எதிரான குற்றங்கள் உள்ளிட்டவை தொடா்பாக 113 புகாா்களுக்கு மனு ரசீது வழங்கப்பட்டுள்ளது. பணம் கொடுக்கல்-வாங்கல் தொடா்பாக 4 புகாா்கள் பெறப்பட்டு ரூ.2.45 லட்சம் பெற்றுத் தரப்பட்டுள்ளது. குடும்பப் பிரச்னை, மாமியாா்-மருமகள் பிரச்னை, பணம் கொடுக்கல் வாங்கல் பிரச்னை தொடா்பாக 467 மனுக்கள் பெறப்பட்டு இருதரப்பையும் அழைத்து சமாதானம் பேசப்பட்டதாக தெரிவிக்கப்பட்டது.