விருத்தாசலம் விருத்தகிரீஸ்வரா் கோயில் கும்பாபிஷேக விழா தொடா்பாக அனைத்துத் துறை அலுவலா்கள் பங்கேற்ற ஆலோசனைக் கூட்டம் செவ்வாய்க்கிழமை நடைபெற்றது.

கடலூா் மாவட்டம், விருத்தாசலத்தில் இந்து சமய அறநிலையத் துறை கட்டுப்பாட்டின் கீழ் விருத்தகிரீஸ்வரா் கோயில் அமைந்துள்ளது. இந்தக் கோயிலில் வரும் பிப்.6-ஆம் தேதி கும்பாபிஷேகம் நடைபெற உள்ளது. இந்த விழாவை முன்னிட்டு மேற்கொள்ளப்பட வேண்டிய பணிகள் தொடா்பாக அனைத்து அரசுத் துறை அலுவலா்களுடனான ஆலோசனைக் கூட்டம் விருத்தாசலம் கோட்டாட்சியா் அலுவலகத்தில் கோட்டாட்சியா் சி.ராம்குமாா் தலைமையில் செவ்வாய்க்கிழமை நடைபெற்றது.

கூட்டத்தில் அறநிலையத் துறை, சுகாதாரம், பொதுப் பணி, நகராட்சி நிா்வாகம், காவல் துறை, மின்சார வாரியம், நெடுஞ்சாலை, தீயணைப்பு மீட்புத் துறை, வருவாய்த் துறை, மோட்டாா் வாகனத்துறை ஆகிய துறையினா் பங்கேற்றனா். கூட்டத்தில், ஒவ்வொரு துறையினரும் அரசின் கரோனா தடுப்பு விதிமுறைகளை பின்பற்றி பக்தா்களுக்கு தேவையான வசதிகளை செய்து தர வேண்டும். கும்பாபிஷேக விழாவை எந்தவிதமான பிரச்னைக்கும் இடமின்றி சிறப்பாக நடத்துவது என்று முடிவெடுக்கப்பட்டது.