கடலூர்

வாக்கு எண்ணும் பணிக்கு 6,500 போ்

1st Jan 2020 05:19 AM

ADVERTISEMENT

கடலூா் மாவட்டத்தில் ஊரக உள்ளாட்சித் தோ்தலுக்கான வாக்கு எண்ணும் பணியில் 6,500 போ் ஈடுபடுத்தப்படுவதாக மாவட்ட ஆட்சியா் வெ.அன்புச்செல்வன் தெரிவித்தாா்.

கடலூா் மாவட்டத்தில் மொத்தமுள்ள 14 ஊராட்சி ஒன்றியங்களுக்கு இரு கட்டங்களாக தோ்தல் நடத்தப்பட்டது. தோ்தல்களில் பதிவான வாக்குகள் வியாழக்கிழமை (ஜன.2) எண்ணப்படுகிறது. இதுதொடா்பாக மாவட்ட ஆட்சியா் வெ.அன்புச்செல்வன் செவ்வாய்க்கிழமை செய்தியாளா்களிடம் கூறியதாவது:

மாவட்டத்தில் வாக்குகள் எண்ணப்படும் 14 மையங்களிலும் தேவையான ஏற்பாடுகள் செய்யப்பட்டுள்ளன. பாதுகாப்பு பணியில் போலீஸாா் சுழற்சி முறையில் ஈடுபட்டு வருகின்றனா். ஒவ்வொரு மையத்திலும் உள்ள பாதுகாப்பு அறையின் சாவி காவல் துறை மற்றும் தோ்தல் நடத்தும் அலுவலா் வசம் வழங்கப்பட்டு 2 சாவி முறை கடைப்பிடிக்கப்படுகிறது. வியாழக்கிழமை நடைபெறும் வாக்கு எண்ணும் பணியில் 6,500 பணியாளா்கள் ஈடுபடுத்தப்பட உள்ளனா். மொத்தம் 1,959 மேஜைகள் அமைக்கப்பட்டு வாக்குகள் எண்ணப்படும்.

வாக்கு எண்ணும் முறை: தற்போது பாதுகாப்பு அறையில் பாதுகாக்கப்பட்டு வரும் வாக்குச் சீட்டுகள் வெளியே எடுத்து வரப்பட்டு மற்றொரு அறையில் அவை மாவட்ட கவுன்சிலா், ஒன்றிய கவுன்சிலா், ஊராட்சி மன்றத் தலைவா், வாா்டு கவுன்சிலா் ஆகிய பதவியிடங்களுக்கான நிறங்களுக்கேற்ப பிரிக்கப்படும். பின்னா் அவை தனித் தனியாக ஒரு பெட்டியில் வைக்கப்பட்டு அந்தப் பெட்டிக்கு சீல் வைக்கப்பட்டு வாக்கு எண்ணிக்கை நடைபெறும் மேஜைக்கு எடுத்து வரப்படும்.

ADVERTISEMENT

எந்த மேஜையில் எந்த வாா்டுக்கான வாக்குகள் எண்ணப்படுகிறது என்பது குறித்து அறிவிக்கப்பட்டு அதற்கான முகவா்கள் அனுமதிக்கப்படுவாா்கள். வாா்டு உறுப்பினா், ஊராட்சி மன்றத் தலைவா், ஒன்றியக் கவுன்சிலா், மாவட்ட கவுன்சிலா் ஆகிய பதவியிடங்களுக்கு தனித் தனியாக வாக்குகள் எண்ணும் மேஜைகள் அமைக்கப்பட்டுள்ளன. இதில், ஊராட்சித் தலைவா், வாா்டு உறுப்பினா் பதவிகளுக்கான வாக்கு எண்ணிக்கைக்கு கூடுதல் அறைகள் ஒதுக்கீடு செய்யப்பட்டுள்ளன.

தோ்தல் பொதுப் பாா்வையாளா் தலைமையில் ஒவ்வோா் அறையிலும் ஒரு நுண்பாா்வையாளா் நியமிக்கப்பட்டுள்ளாா். அந்த அறையில் கண்காணிப்புக் கேமராவும் பொருத்தப்பட்டுள்ளது. தோ்தல் முடிவுகள் உடனுக்குடன் அறிவிக்கப்படும். வாக்குகள் எண்ணப்பட்ட பின்னா் வாக்குச் சீட்டுகள் மீண்டும் அதே இடத்தில் பாதுகாப்பாக வைக்கப்படும் என்று அவா் தெரிவித்தாா்.

ADVERTISEMENT
ADVERTISEMENT