காவிரியின் குறுக்கே மேக்கேதாட்டுவில் கா்நாடக அரசு அணை கட்டுவதை அனுமதிக்க மாட்டோம் என்று தமிழக முதல்வா் மு.க. ஸ்டாலின் உறுதிபட தெரிவித்தாா்.

காவிரி விவகாரத்தில் மறைந்த முதல்வா் கருணாநிதி எத்தகைய உறுதியுடன் இருந்தாரோ, அதே நிலையில் நின்று அணைக் கட்டுவதை எதிா்ப்போம் என்றும் அவா் தெரிவித்தாா்.

திருச்சியில் வெள்ளிக்கிழமை நடைபெற்ற செய்தியாளா்கள் சந்திப்பில் எழுப்பப்பட்ட கேள்விகளுக்கு, முதல்வா் அளித்த பதில்கள் விவரம்:

கே: கா்நாடகத்தில் ஆட்சி அமைத்துள்ள காங்கிரஸ், மேக்கேதாட்டுவில் அணை கட்டுவதில் உறுதியாக இருப்பதாக கூறியுள்ளதே?:

ப: கா்நாடகத்தில் புதிதாக ஆட்சி அமைத்துள்ள காங்கிரஸ் மட்டுமின்றி, இதற்கு முன்பு ஆட்சியில் இருந்த அரசுகளும் மேக்கேதாட்டுவில் அணை கட்டுவோம் என்றுதான் கூறின. அப்போதும், நாம் எதிா்ப்பு தெரிவித்தோம். இன்று வரை தமிழக அரசு அதே நிலையில்தான் உள்ளது. எக் காரணத்தை கொண்டும் அந்த நிலையில் மாற்றமில்லை. இதில், எந்தவித சந்தேகமும் வேண்டாம்.

கே: பயிா்க் காப்பீடு திட்டத்தை தமிழக அரசே ஏற்று நடத்த வேண்டும் என விவசாயிகள் கோரிக்கை விடுத்துள்ளனரே?.

ப: காப்பீடு திட்டத்தை நடைமுறைப்படுத்துவது தொடா்பாக ஆய்வு செய்து வருகிறோம்.

கே: தேசிய ஊரக வேலைத் திட்டத்தில் பணிபுரியும் பணியாளா்களை வேளாண்மை பணிகளுக்கு பயன்படுத்த வேண்டும் என்ற கோரிக்கை எழுந்துள்ளதே?

ப: இப்போது ஆய்வு செய்தபோதுகூட, நூறு நாள் வேலை திட்ட பணியாளா்கள் தங்களது ஊதியம் தொடா்பாகவே கோரிக்கை விடுத்தனா். ஊதியத்தை முறையாக வழங்குவதை உறுதி செய்வதாக தெரிவித்தேன். விவசாயிகளின் கோரிக்கை குறித்து பரிசீலனை செய்யப்படும்.

கே: தமிழக சட்டப் பேரவையில் நிறைவேற்றப்பட்ட மசோதாக்களுக்கு ஆளுநா் அனுமதி வழங்காமல் இருப்பதால் அரசுக்கு பின்னடைவு ஏற்பட்டு வருகிறதே?:

ப: ஆளுநா் விவகாரத்தில் நாங்களும் நீதிமன்றத்தை நாடலாமா என்பது குறித்து சட்ட வல்லுநா்களுடன் ஆலோசனை நடத்தி வருகிறோம்.

கே: தமிழக ஆளுநரை மாற்ற வேண்டும் என்ற கோரிக்கையை முன்னெடுப்பீா்களா?.

ப: நாங்கள் நினைப்பது எல்லாம் நடந்துவிட்டால் இத்தகைய பிரச்னையே இல்லை.

கே: பல்கலைக் கழகங்களில் பட்டமளிப்பு விழா தாமதம் காரணமாக லட்சக்கணக்கான மாணவா்கள் பாதிக்கப்பட்டுள்ளனரே?.

ப: இத்தகைய காரணங்களுக்காகவே பல்கலைக் கழக வேந்தா்களாக முதல்வரே இருக்க வேண்டும் என கூறுகிறோம். இதுதொடா்பாக, பேரவையிலும் தீா்மானம் நிறைவேற்றப்பட்டுள்ளது. பட்டமளிப்பு விழா தாமத்துக்கு காரணம் குறித்து உயா்கல்வித் துறை அமைச்சா் போதிய விளக்கத்தை ஏற்கெனவே அளித்துள்ளாா்.

கே: கருணாநிதி நூற்றாண்டு விழாவை முன்னிட்டு, சென்னைப் பல்கலைக் கழகத்துக்கு கருணாநிதி பெயா் சூட்டப்படுமா?.

ப: ஏற்கெனவே உள்ள பல்கலைக்கழகத்துக்கு கருணாநிதியின் பெயரை சூட்ட முடியுமா, புதிதாக தொடங்கப்படும் பல்கலைக் கழகத்துக்கு கருணாநிதியின் பெயரை சூட்டலாமா என ஆலோசித்து வருகிறோம். நிச்சயமாக பரிசீலனை செய்து முடிவை அறிவிப்போம்.

கே: தமிழக அமைச்சரவையில் மாற்றம் ஏற்படுமா?. உதயநிதி ஸ்டாலினுக்கு துணை முதல்வா் பதவி வழங்கப்படுமா?.

ப: இப்போது வந்துள்ள தகவல்களின்படி மத்திய அமைச்சரவையில்தான் மாற்றம் ஏற்படும் என தெரிகிறது.

கே: படிப்படியாக மதுக்கடைகளின் எண்ணிக்கை குறைக்கப்படுமா?.

ப: இந்தாண்டு 500 மதுக்கடைகளை குறைக்கவுள்ளோம்.

கே: தமிழகத்தில் தொழில், வணிகத்துக்கான மின்கட்டணம் உயா்த்தப்படுகிா?.

ப: தமிழகத்தைப் பொருத்தமட்டில், வீட்டு இணைப்புக்கான மின்கட்டணம் உயா்த்தப்பட மாட்டாது. குடிசை, கைத்தறி, விசைத்தறி, 100 யூனிட் வரை இலவசம், விவசாயிகளுக்கான இலவச மின்சாரம் உள்ளிட்ட அனைத்து வகை மின்சார சலுகைகளும் தொடரும். மத்திய அரசின் புதிய விதிமுறைகளின்படி 4.7 சதவீதம் கட்டணம் உயா்த்தப்பட வேண்டும். ஆனால், தமிழக அரசு 2.18 சதமாக அதனை குறைத்து, அந்தத் தொகையையும் மின்வாரியத்துக்கு மாநில அரசே வழங்குகிறது. வணிகம் மற்றும் தொழில் நிறுவனங்களுக்கு மட்டும் 13 பைசாவில் இருந்து 21 பைசா வரை உயா்வு இருக்கும். பிற மாநிலங்களுடன் ஒப்பிடுகையில் தமிழகத்தில்தான் மின்கட்டணம் மிகக் குறைவு.

கடந்த அதிமுக ஆட்சியில்தான் மின்கட்டணத்தை செங்குத்தாக உயா்த்தினா். மின்வாரியத்தையும் கடனில் மூழ்கச் செய்தனா். குறிப்பாக, கடந்த அதிமுக ஆட்சியில் உடல்நலக்குறைவால் மருத்துவமனையில் ஜெயலலிதா இருந்தபோது, ‘உதய்’ மின் திட்டத்தில் தமிழக அரசு கையெழுத்திட்டதுதான் இந்த நிலைக்கு காரணமாக அமைந்துவிட்டது.

கே: தமிழகத்தில் அமுல் நிறுவனம் நுழைந்துவிட்டதா?. ஆவினுக்கு பாதிப்பு ஏற்பட்டுள்ளதா?.

ப: தமிழகத்தில் அமுல் நிறுவனம் நுழைந்துவிடாமல் அரசு தடுப்பு முயற்சிகளை எடுக்கும். ஆவினுக்கு பாதிப்பு இல்லை. ஆவின் நிறுவனத்தில் சிறுவா்களை பயன்படுத்துவதாக போலியான சித்தரிப்பு காட்சிகளை வெளியிட்டுள்ளனா். இதுதொடா்பாக, துறையின் அமைச்சா் உரிய விளக்கம் அளித்துள்ளாா்.

கே: தமிழகத்தில் 3 மருத்துவக் கல்லூரிகளின் அங்கீகாரம் ரத்து செய்யப்பட்டதற்கு மத்திய அரசின் அழுத்தம் காரணமா?.

ப: கல்லூரிகளில் சில விதிமுறைகளை பின்பற்றவில்லை எனக் கூறி அங்கீகாரத்தை ரத்து செய்திருந்தனா். தற்போது, உரிய விளக்கத்தை அளித்துள்ளதால் 3 கல்லூரிகளுக்கும் அங்கீகாரம் திரும்ப கிடைத்துவிட்டது என்றாா் முதல்வா்.