திருச்சி மாவட்டத்தில் உள்ள பிற்படுத்தப்பட்டோா், மிகப் பிற்படுத்தப்பட்டோா், சீா் மரபினா் மற்றும் சிறுபான்மையினா் நலப் பள்ளி விடுதிகளில் சேர பள்ளி மாணவ, மாணவிகளிடமிருந்து விண்ணப்பங்கள் வரவேற்கப்படுகின்றன.

திருச்சி மாவட்டத்தில் பிற்படுத்தப்பட்டோா், மிகவும் பிற்படுத்தப்பட்டோா் சீா்மரபினா் மற்றும் சிறுபான்மையினா் நலத் துறையின் கீழ் இயங்கும் விடுதிகளில் 23 விடுதிகள் மாணவருக்கும், 14 விடுதிகள் மாணவியருக்கு என மொத்தம் 37 விடுதிகள் செயல்படுகின்றன. இந்த விடுதிகளில் 4 முதல் 12ஆம் வகுப்பு வரை பயிலும் மாணவ, மாணவிகள் சேரத் தகுதியுடைவா்கள். ஒவ்வொரு விடுதியிலும் முகாம் வாழ் இலங்கைத் தமிழா்களின் குழந்தைகளுக்கென தனியே 5 இடங்கள் ஏற்படுத்தப்பட்டுள்ளன.

அனைத்து விடுதி மாணவ, மாணவிகளுக்கும் உணவு, உறைவிடம் இலவசமாக வழங்கப்படுகிறது. 10ஆம் வகுப்பு வரை பயிலும் மாணவ, மாணவியருக்கு சீருடைகள் வழங்கப்படும். 10, 12 ஆம் வகுப்பு மாணவ, மாணவியருக்கு சிறப்பு வழிகாட்டி கையேடுகள் வழங்கப்படும்.

விடுதிகளில் சேர பெற்றோா், பாதுகாவலரது ஆண்டு வருமானம் ரூ.2 லட்சத்துக்கு மிகாமலிருக்க வேண்டும்.

இருப்பிடத்திலிருந்து பயிலும் கல்வி நிலையத்தின் தொலைவு குறைந்தபட்சம் 8 கி.மீக்கு மேல் இருக்க வேண்டும். இந்த தூர விதி மாணவிகளுக்குப் பொருந்தாது.

தகுதியுடைய மாணவ, மாணவிகள் விண்ணப்பங்களை சம்பந்தப்பட்ட விடுதிக் காப்பாளரிடமிருந்தோ அல்லது ஆட்சிரகத்திலுள்ள மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலகத்திலிருந்தோ இலவசமாகப் பெற்றுக் கொள்ளலாம்.

பூா்த்தி செய்த விண்ணப்பங்களை வரும் 23ஆம் தேதிக்குள் விடுதிக் காப்பாளரிடம் சமா்ப்பிக்க வேண்டும். விண்ணப்பத்துடன் சாதி, வருமானச் சான்று வழங்கத் தேவையில்லை. விடுதியில் சேரும்போது சான்றிதழ்களை அளித்தால் போதும். காலக்கெடுவுக்குள் வராத விண்ணப்பங்கள் ஏற்கப்படாது என ஆட்சியா் மா. பிரதீப்குமாா் தெரிவித்தாா்.