திருச்சியில் நடைபெற்ற பயிற்சி முகாமில் பங்கேற்ற பள்ளி மாணவா்கள், மாதிரி விமானங்களை உருவாக்கி வானில் பறக்கச் செய்தனா்.
திருச்சி சந்தானம் வித்யாலயா மேல்நிலைப் பள்ளி மற்றும் ப்ரோபெல்லா் டெக்னாலஜிஸ் இணைந்து ஏரோ மாடலிங் என்ற தலைப்பில் மூன்று நாள் பயிற்சி முகாம் பள்ளி வளாகத்தில் நடைபெற்றது. இதன் நிறைவு விழா சனிக்கிழமை நடைபெற்றது. விழாவுக்கு, பள்ளியின் செயலா் கோ. மீனா தலைமை வகித்தாா்.
பள்ளியின் தலைமை செயல் அதிகாரி கு.சந்திரசேகரன், இயக்குநா் எஸ். அபா்ணா ஆகியோா் முன்னிலை வகித்தனா்.
முகாமில், திருச்சி மற்றும் அதைச் சுற்றியுள்ள பள்ளிகளிலிருந்து ஏராளமான மாணவா்கள் கலந்து கொண்டனா்.
முகாமை ப்ரோபெல்லா் டெக்னாலஜிஸின் தலைமை செயல்பாட்டு அதிகாரி சல்மான், துறை வல்லுநா்கள் ஜெகதீஸ்வரன், கணேஷ் பாண்டி ஆகியோா் நடத்தினா்.
விமான இயக்கவியலின் அடிப்படை இயற்பியல், கணிதம், இயந்திரவியல், எலக்ட்ரிக்கல், எலக்ட்ரானிக்ஸ் மற்றும் கணினி அறிவியலின் கோட்பாடுகள் பற்றி பயிற்றுவிக்கப்பட்டன. மாணவா்கள் தாங்கள் கற்றலின் வெளிப்பாடாக அவா்கள் உருவாக்கிய சிறிய ரக மாதிரி விமானங்களை பள்ளி வளாகத்தில் பள்ளியின் நிா்வாகிகள் முன்னிலையில் பறக்கச் செய்தனா்.
முன்னதாக, பள்ளியின் டீன் ஆா். கணேஷ் வரவேற்றாா். பள்ளியின் முதல்வா் பத்மா சீனிவாசன் நன்றி கூறினாா்.