திருச்சியில் உணவகத்தில் ஏற்பட்ட தகராறில் டீ மாஸ்டரை தாக்கி கொன்ற தொழிலாளியை போலீஸாா் வியாழக்கிழமை கைது செய்தனா்.

திருச்சி புத்தூா் களத்துமேடு வடக்கு முத்துராஜா தெருவைச் சோ்ந்தவா் ஆல்பா்ட் மகன் தினேஷ்குமாா் (40), டீ மாஸ்டா். தஞ்சாவூா் மாவட்டம், பட்டுக்கோட்டை சூரப்பள்ளம் பகுதியைச் சோ்ந்தவா் தொழிலாளி குமாா் (41).

இருவரும் புதன்கிழமை இரவு திருச்சி அரசு மருத்துவமனை எதிரேயுள்ள உணவகத்தில் சாப்பிட்டபோது யாருக்கு உணவக ஊழியா் முதலில் சாம்பாா் ஊற்றுவது என்பதில் இருவருக்கும் தகராறு ஏற்பட்டுள்ளது. இதில் ஆத்திரமடைந்த குமாா், அங்கிருந்த கட்டையால் தினேஷ்குமாரை சரமாரியாகத் தாக்க, இதில் படுகாயமடைந்த அவா் திருச்சி அரசு மருத்துவமனையில் சோ்க்கப்பட்டு சிகிச்சை பலனின்றி இரவு இறந்தாா். திருச்சி அரசு மருத்துவமனை வளாக போலீஸாா் வழக்குப் பதிந்து, குமாரை கைது செய்து விசாரிக்கின்றனா்.