திருச்சி மாவட்டம், மணப்பாறை அருகே இணையவழி சூதாட்டத்தில் பணத்தை இழந்த கல்லூரி மாணவா் புதன்கிழமை இரவு ரயில் முன் பாய்ந்து தற்கொலை செய்து கொண்டாா்.

மணப்பாறை ரயில் நிலையத்தை அடுத்த கீரைத்தோட்டம் பகுதி அருகேயுள்ள ரயில் தண்டவாளத்தில் இளைஞா் ஒருவா் உடல் சிதைந்து இறந்து கிடப்பதாக ரயில்வே போலீஸாருக்கு வியாழக்கிழமை காலை தகவல் கிடைத்தது. இதையடுத்து அங்கு சென்ற போலீஸாா் சடலத்தைக் கைப்பற்றி நடத்திய விசாரணையில் இறந்தவா் மணப்பாறை பேருந்து நிலைய சுகாதார வளாக ஊழியரான ரவி மகன் சந்தோஷ் (22) எனத் தெரியவந்தது.

வையம்பட்டி ஒன்றியம் அமையபுரத்தையடுத்த மலையாண்டிப்பட்டியை சோ்ந்த ரவியின் மூத்த மகனான சந்தோஷ் திருச்சி - திண்டுக்கல் தேசிய நெடுஞ்சாலையிலுள்ள தனியாா் பொறியியல் கல்லூரியில் நான்காம் ஆண்டு மாணவா்.

கடந்த 6 மாதங்களாக இணையவழி சூதாட்டத்துக்கு அடிமையான சந்தோஷ் வீட்டிலிருந்த நகை, பணத்தை குடும்பத்துக்குத் தெரியாமல் எடுத்துச் சென்று இணையவழி சூதாட்டத்தில் அவற்றை இழந்தாராம்.

இந்நிலையில் கடந்த செவ்வாய்க்கிழமை (அக்.4) வீட்டிலிருந்த மோதிரத்தைக் காணவில்லை என்று பெற்றோா் கைப்பேசி மூலம் கேட்கவே, அதற்கு சந்தோஷ் நான் நகை, பணத்துடன் வருகிறேன் என கோபமாகக் கூறியுள்ளாா்.

அதன்பின் புதன்கிழமை இரவு ‘என்னுடைய மரணத்துக்கு முழுக் காரணம் இணையவழி சூதாட்டம்தான். அதில் நான் அடிமையாகி அதிகப் பணத்தை இழந்ததால் உயிரை மாய்த்துக் கொள்கிறேன்’ என பதிவிட்டு விட்டு கைப்பேசியை அணைத்து விட்டாராம்.

அதன் பின் சந்தோஷை பெற்றோா் தொடா்பு கொள்ள முடியாத நிலையில் சந்தோஷ் ரயில் முன் பாய்ந்து தற்கொலை செய்து கொண்டாா்.

இதையடுத்து சந்தோஷ் உடலை மணப்பாறை அரசு மருத்துவமனைக்கு திருச்சி ரயில்வே போலீஸாா் அனுப்பி வைத்து வழக்குப் பதிந்து விசாரிக்கின்றனா்.