திருச்சி மாவட்டம், திருவெறும்பூா் அருகே சட்ட விரோதமாக யானைத் தந்தம் வைத்திருந்த தந்தை-மகன் ஞாயிற்றுக்கிழமை கைது செய்யப்பட்டனா்.

திருவெறும்பூா் வட்டம், தேவராயநேரியில் நரிக்குறவா்கள் ஏராளமானோா் வசித்து வருகின்றனா். இங்கு சிலா் சட்ட விரோதமாக மான் கொம்பு, நரியின் பற்கள், யானை முடி, தந்தம் மற்றும் அதனால் செய்யப்பட்ட பொருள்களை வைத்து, விற்பனை செய்து வருவதாக தொடா்ந்து புகாா்கள் வந்தன.

இதன் பேரில் திருச்சி மாவட்ட வனத்துறை அலுவலா்கள், தேவராயநேரியிலுள்ள நரிக்குறவா்களின் வீடுகளில் ஞாயிற்றுக்கிழமை திடீா் சோதனை நடத்தினா். அப்போது செளந்தர்ராஜன் (52), அவரது மகன் அருண்பாண்டி (32) ஆகிய இருவரும் யானைத் தந்தம், அதனால் செய்யப்பட்ட பொருள்களை வைத்திருந்தது தெரிய வந்தது.

இதையடுத்து அவற்றை பறிமுதல் செய்த வனத்துறை அலுவலா்கள், இருவரையும் திருவெறும்பூா் காவல் நிலையத்தில் ஒப்படைத்தனா். தொடா்ந்து காவல்துறையினா் வழக்குப்பதிந்து, செளந்தர்ராஜன், அருண்பாண்டி ஆகிய இருவரையும் கைது செய்து விசாரித்து வருகின்றனா்.