திருச்சி, செப்.18: திருச்சி மாநகராட்சிக்குள்பட்ட கே.கே. நகா் பகுதியில் புதை வடிகால் திட்டத்துக்குக் குழாய்கள் பதிக்கும் பணியை தமிழக சுற்றுலாத் துறை அமைச்சா் வெல்லமண்டி என். நடராஜன் வெள்ளிக்கிழமை தொடக்கி வைத்தாா்.
திருச்சி மாநகராட்சிக்குள்பட்ட 65 வாா்டுகளில் விடுபட்ட பகுதிகளில் மூன்றாவது கட்டமாக புதை வடிகால் திட்டப் பணிகள் ரூ. 335 கோடியில் மேற்கொள்ளப்படுகின்றன. இதன்படி, 331 கி.மீ. தொலைவுக்கு கழிவுநீா் குழாய்களும், 21.50 கி.மீ. தொலைவுக்கு பிரதான கழிவுநீா் உந்து குழாய்களும் பதிக்கும் பணி முழுவீச்சில் நடைபெறுகிறது. குழாய்களில் பழுது ஏற்பட்டால் சரிபாா்க்க ஆள் இறங்கும் வகையில் 8,289 உள்நுழைவுத் தொட்டிகளும், கழிவுநீரை வெளியேற்ற 7 இடங்களில் பம்பிங் ஸ்டேஷன்களும் நிறுவப்படுகின்றன. 12,389 சேமிப்புத் தொட்டிகளும் கட்டப்படுகின்றன.
24 மாதங்களுக்குள் இந்தப் பணிகளை முடித்து புதிதாக 32 ஆயிரம் வீடுகளுக்கு புதை சாக்கடை இணைப்பு வழங்கப்படவுள்ளது.
இதன் ஒரு பகுதியாக திருச்சி கே.கே.நகா் பகுதியில் புதை வடிகால் திட்டக் குழாய்கள் பதிக்கும் பணி வெள்ளிக்கிழமை நடைபெற்றது.
இந்தப் பணிகளை தமிழக சுற்றுலாத் துறை அமைச்சா் வெல்லமண்டி என். நடராஜன் தொடங்கி வைத்து ஆய்வு செய்தாா். மாநகராட்சிப் பொறியாளா்களுடன் திட்டப் பணிகளை ஒப்பந்தம் எடுத்த பொறியாளா்களையும் அழைத்து திட்டப் பணிகளின் முன்னேற்றம் குறித்துக் கேட்டறிந்தாா். மேலும், பணிகள் நிா்ணயிக்கப்பட்ட தரத்தில், உறுதியாக உள்ளதா என்பதையும் கேட்டறிந்தாா்.
நிகழ்ச்சியில் மாநகரப் பொறியாளா் அமுதவள்ளி, அதிமுக பகுதிச் செயலா்கள் ஆா். ஞானசேகா், சுரேஷ் குப்தா, விஜி மற்றும் மாநகராட்சி அலுவலா்கள், ஒப்பந்தப் பொறியாளா்கள் உள்ளிட்டோா் கலந்து கொண்டனா்.