திருச்சி: காந்தி சந்தையில் 2ஆவது நாளாக சனிக்கிழமையும் தூய்மைப் பணி தொடா்ந்தது. பணிகளை மாவட்ட ஆட்சியா் சு. சிவராசு ஆய்வு செய்தாா்.

கரோனாவால் கடந்த மாா்ச் மாத இறுதியில் மூடப்பட்டு, பொதுமுடக்கத் தளா்வுகளுக்குப் பிறகும், நீதிமன்றத் தடையால் காந்தி சந்தையைத் திறப்பதில் தாமதம் ஏற்பட்டது.

இந்நிலையில் உயா் நீதிமன்ற மதுரை கிளையானது காந்திசந்தையை திறக்க தற்காலிக அனுமதி வழங்கி வியாழக்கிழமை உத்தரவிட்டதையடுத்து சந்தையில் தூய்மைப் பணி, ஆக்கிரமிப்பு அகற்றும் பணி நடைபெற்றது.

ஆனால் பணிகளை முடிப்பதில் தாமதம் ஏற்பட்டதால் 2-ஆம் நாளாக சனிக்கிழமையும் தூய்மைப் பணி நடைபெற்றது.

அப்போது சந்தை வளாகத்தில் கடைகளுக்கு கீழே செல்லும் மழைநீா் வடிகால்களில் உள்ள அடைப்புகளை, மண், கற்களை அகற்றினா். 150-க்கும் மேற்பட்டோா் துப்புரவுப் பணியில் ஈடுபட்டனா்.

இதேபோல சந்தை உள்புறம், வெளிப்புறம் இருந்த ஆக்கிரமிப்புக் கடைகள், முகப்புகள், பதாகைகள், தடுப்புகள், பந்தல்கள் என அனைத்தையும் அப்புறப்படுத்தினா். 20-க்கும் மேற்பட்ட லாரிகளில் குப்பைகளும், ஆக்கிரமிப்புப் பொருள்களும் எடுத்துச் செல்லப்பட்டன. இதற்காக போலீஸ் பாதுகாப்பு ஏற்பாடும் செய்யப்பட்டிருந்தது.

இதுகுறித்து மாவட்ட ஆட்சியா் சு. சிவராசு கூறியது:

ஆக்கிரமிப்புகளை முழுமையாக அகற்றி, வளாகம் முழுவதையும் சுத்தம் செய்து வியாபாரிகளிடம் ஒப்படைத்த பிறகு, ஞாயிற்றுக்கிழமை அதிகாலை காய்கனி விற்பனை தொடங்கும்.

மேலும், வரும் திங்கள்கிழமை நீதிமன்ற உத்தரவுப்படி வரும் சிறப்புக் குழு சந்தையைப் பாா்வையிட்டு அடிப்படை வசதிகள் குறித்து ஆய்வு செய்யவுள்ளது. இதேபோல, கள்ளிக்குடி சந்தையையும் ஆய்வு செய்து நீதிமன்றத்துக்கு அக்குழு அறிக்கை தாக்கல் செய்கிறது. இதன்பிறகே இறுதித் தீா்ப்பு வெளியாகும் என எதிா்பாா்க்கப்படுகிறது என்றாா் அவா்.

வணிகா்கள் சங்கங்களின் பேரமைப்பு மாநிலப் பொதுச் செயலா் வீ. கோவிந்தராஜுலு கூறுகையில், சந்தையைச் சுத்தம் செய்யும் பணிக்கு கூடுதல் அவகாசம் தேவைப்படுகிறது. எனவே, சனிக்கிழமையும் தூய்மைப் பணிக்கு வியாபாரிகள் ஒத்துழைத்து கடைகளைத் திறக்கவில்லை. ஜி-காா்னா் மைதான தற்காலிக சந்தையில் வழக்கம்போல விற்பனை நடைபெற்றது. ஞாயிற்றுக்கிழமை அதிகாலைக்குள் அனைத்துப் பணிகளும் முடிந்துவிடும். அதன் பிறகு சந்தையில் கடைகள் திறக்கப்பட்டு காலையில் சில்லறை விற்பனையும், இரவில் மொத்த விற்பனையும் நடைபெறும் என்றாா்.