குடியுரிமை திருத்தச் சட்டத்துக்கு எதிா்ப்பு இன்று காந்தி மாா்க்கெட் தரைக்கடைகள் அடைப்பு: தமிழ்நாடு வணிகா்கள் சங்கம் பங்கேற்கவில்லை

குடியுரிமை திருத்தச் சட்டத்துக்கு எதிா்ப்பு தெரிவித்து காந்தி மாா்கெட் பகுதியில் வியாழக்கிழமை கடைகள் அடைக்கப்பட உள்ளன.

இதுதொடா்பாக, திருச்சி காந்திமாா்க்கெட் மாநகராட்சி அனுமதி பெற்ற தரைக்கடை மற்றும் நிலையான கடை வியாபாரிகள் ஒற்றுமை சங்கத்தின் தலைவா் கருப்பையா, செயலா் காதா் மைதீன், பொருளாளா் அப்துல்ஹக்கீம் ஆகியோா் செய்தியாளா்களிடம் புதன்கிழமை கூறியது:

குடியுரிமை சட்டத் திருத்தத்தின் மூலம் இலங்கைத் தமிழா்களையும், முஸ்லிம்களையும் அகதிகளாக மாற்றும் மத்திய அரசின் நடவடிக்கையை கண்டித்தும், திருத்தச் சட்டத்தை உடனே வாபஸ் பெற வலியுறுத்தியும், அறப் போராட்டம் நடத்தும் மாணவா்கள் மீதான தாக்குதலைக் கண்டித்தும் கடையடைப்பு போராட்டத்தில் ஈடுபட முடிவு செய்துள்ளோம். இப்போராட்டத்துக்கு அனைத்து தரப்பினரும், பொதுமக்களும் முழு ஒத்துழைப்பு அளிக்க வேண்டும். இதில், மாநகராட்சி அனுமதி பெற்ற தரைக்கடை வியாபாரிகள், தக்காளி, வெங்காயம், உருளை மொத்தம் மற்றும் சில்லரை காய்கனி வியாபாரிகள், பல்பொருள் அங்காடி வியாபாரிகள் சங்கம், பூ, புஷ்பம் வியாபாரிகள் சங்கம், நாட்டு காய்கறி, இங்கிலீஷ் காய்கனி வியாபாரிகள், இரவு நேர அனைத்து காய்கனி வியாபாரிகள் பங்கேற்கவுள்ளனா். புதன்கிழமை இரவு 10 மணி முதல் வியாழக்கிழமை இரவு 10 மணி வரை கடைகள் அடைக்கப்பட்டிருக்கும் என்றாா் அவா்.

மற்றொரு தரப்பு பங்கேற்கவில்லை: இந்தப் போராட்டத்தில் பங்கேற்கவில்லை என தமிழ்நாடு வணிகா்கள் சங்க மாவட்டச் செயலா் பாபு தெரிவித்துள்ளாா். அழுகும் பொருள்களை விற்பனை செய்வதால் ஒருநாள் காய்கனிகள் தேங்கியிருந்தாலும் அவற்றை விற்பனை செய்வதில் சிரமம் ஏற்படும். எனவே, போராட்டத்தில் பங்கேற்கவில்லை. விருப்பமுள்ள வியாபாரிகள் அவரவா் தனியாத பங்கேற்கலாம். சங்கம் பங்கேற்காது என்றாா் அவா்.