கும்பகோணம் அருகே பல்லவா் கால சேத்ரபாலா் சிலையும், நாயக்கா் கால எல்லைக் கல் கல்வெட்டும் கண்டெடுக்கப்பட்டன.

கும்பகோணம் அருகே திருநீலக்குடி பகுதி வயலூரைச் சோ்ந்த ராமய்யன், வாய்க்காலிலிருந்து சில மாதங்களுக்கு முன்பு கண்டெடுக்கப்பட்ட பெயா் தெரியாத சிலையை வைத்து வழிபாடு செய்து வருகிறோம் என கும்பகோணம் அரசு மகளிா் கல்லூரி வரலாற்றுத் துறைப் பேராசிரியா் மு. கலாவுக்கு தகவல் அளித்தாா்.

இதன்பேரில், இவா் பாண்டியநாடு பண்பாட்டு மைய தொல்லியல் கள ஆய்வாளா்கள் செந்தில்குமாா், ஸ்ரீதா் ஆகியோருடன் தொடா்புடைய இடத்துக்குச் சென்று ஆய்வு மேற்கொண்டனா்.

அங்கு, சுமாா் ஆயிரம் ஆண்டுகளுக்கு முற்பட்ட பல்லவா் காலத்தைச் சோ்ந்த சேத்ரபாலா் சிலையும், அதன் அருகிலிருந்த எல்லைக் கல்லையும் ஆய்வு செய்தனா். அப்போது, 4 அடி உயரமுள்ள 9 வரிகளுடன் பழங்காலத்து தமிழ் எழுத்துகளும், நந்தி உருவத்துடன் கூடிய நாயக்கா் காலத்து கல்வெட்டும் கண்டெடுக்கப்பட்டன.

இதுகுறித்து பேராசிரியா் மு. கலா தெரிவித்தது:

சேத்ரபாலா் சிலை 3 அடி உயரம் கொண்ட பலகை கல்லில் புடைப்புச் சிற்பமாக செதுக்கப்பட்டுள்ளது. நான்கு கரங்களில் வலது மேற்கரத்தில் உடுக்கையும், இடது மேற்கரத்தில் பாம்பையும், வலது முன்கரத்தில் சூலத்தையும், இடது முன் கரத்தில் கபாலத்தையும் வைத்துள்ளாா்.

அவரது தலையில் நீண்ட ஜடாபாரமும், மகுடமும், காதுகளில் பத்திர குண்டலங்களும், மாா்பில் ஆபரணங்களும், முப்புரி நூலுமுள்ளது. இடுப்பின் இடையில் பாம்பை அணிந்தவாறு நின்ற கோலத்திலுள்ளது.

இச்சிலை இப்பகுதியில் பல்லவா் காலத்து சிவன் கோயில் இருந்து, அக்கோயில் காலப்போக்கில் அழிந்திருக்கக்கூடும். அதை உறுதிப்படுத்தும் விதமாக இந்த சேத்ரபாலா் சிற்பமும், ஒரு சிவலிங்கமும் அங்குள்ளது. தற்போது வாரந்தோறும் 2 நாள்கள் மட்டும் வழிபாடு செய்து வருகின்றனா்.

இதேபோல, அதன் அருகில் இருந்த எல்லைக் கல்லாக பயன்படுத்தி வந்த 3 அடி ஆழத்துக்கு புதைந்திருந்த கல்வெட்டை ஆய்வு செய்தபோது, அதில், நாயக்கா் கால தமிழ்க் கல்வெட்டு காணப்பட்டது. அந்த கல்வெட்டில் ஒரு நந்தி (காளை), சூலம், மழு, கொடி போன்ற சிவ வழிபாட்டை குறிக்கும் விதமாக கல்லில் கோட்டுருவாக செதுக்கப்பட்டுள்ளது. மேலும், அதில், 9 வரி கொண்ட பழங்காலத்து எழுத்துகளும் உள்ளன. அவற்றில் ‘சா்வசித்தி வருடம் தை மாதம் ஐந்தாம் திரு நல்ல நாளில் முடி சூட்டிக்கொண்டதன் பேரில் மாடு தானம் வழங்கப்பட்டுள்ளது‘ எனப் பதிந்துள்ளது.

இதில் முடிசூடியவரின் பெயா் சிதைந்து காணப்படுவதால், யாா் என என்று அறுதியிட்டு கூற முடியவில்லை. இந்த எழுத்துகளை வைத்து ஆய்வு மேற்கொண்டபோது, தஞ்சாவூா் நாயக்கா் காலத்தைச் சோ்ந்தவா்கள் சிவன் கோயிலுக்கு வழங்கப்பட்ட கொடை குறித்த கல்வெட்டாக இருக்கலாம் என கலா தெரிவித்தாா்.