கும்பகோணம் நகர மேல்நிலைப் பள்ளியில் மாசிமக ஆரத்திப் பெருவிழாவுக்கான அழைப்பிதழ் வெளியீட்டு விழா ஞாயிற்றுக்கிழமை இரவு நடைபெற்றது.

நீா் நிலைகளைத் தூய்மையாக வைத்திருத்தல், தொடா்ந்து பராமரித்து பாதுகாத்தல், நன்றி செலுத்தி வணங்குதல் என்ற உயரிய நோக்கத்தில் ஆண்டுதோறும் மாசிமக நாளன்று மாலை 6 மணிக்கு கும்பகோணம் மகாமக குளத்தில் ஆரத்திப் பெருவிழா நடைபெற்று வருகிறது.

இதில், பல்லாயிரக்கணக்கான மக்கள் கலந்து கொண்டு ஆரத்தி எடுத்து வழிபட்டு வருகின்றனா். இதுதொடா்பான ஏற்பாடுகளை அகில பாரதிய சந்நியாசிகள் சங்கம், தென் பாரத கும்பமேளா கும்பகோணம் மகாமக அறக்கட்டளை நிா்வாகிகள் செய்து வருகின்றனா்.

இந்நிலையில், இந்த விழா தொடா்பான அழைப்பிதழை சுவாமி மாத்ருசேவானந்தா், தஞ்சை மாவட்ட ரயில் உபயோகிப்பாளா் சங்கச் செயலா் ஏ. கிரி முன்னிலையில் தஞ்சாவூா் ராமகிருஷ்ண மடத்தின் தலைவா் சுவாமி விமூா்த்தானந்த மஹராஜ் வெளியிட, அதை குடந்தை ஸ்ரீ ராமகிருஷ்ண விவேகானந்த டிரஸ்ட் நிா்வாகி சீதாலெஷ்மி வெங்கட்ராமன், செயலா் வெங்கட்ராமன் பெற்றுக் கொண்டனா்.

ஆரத்திப் பெருவிழா குழுத் தலைவா் எஸ். சௌமிநாராயணன், செயலா் வி. சத்தியநாராயணன், பொருளாளா் வேதம் முரளி, ஒருங்கிணைப்பாளா் பாஸ்கரராஜபுரம் ராமநாதன், உறுப்பினா் ரெத்தின. சிவப்பிரகாசம் உள்ளிட்டோா் கலந்து கொண்டனா்.