தஞ்சாவூா் ராஹத் பேருந்து நிறுவனத்தில் முதலீடு செய்து ஏமாற்றமடைந்த ஏறத்தாழ 1,000 போ் மாவட்டக் காவல் அலுவலகம் முன் திங்கள்கிழமை திரண்டனா்.

தஞ்சாவூா் மாவட்டம், அய்யம்பேட்டை பகுதியில் ராஹத் பேருந்து நிறுவனம் இயங்கி வந்தது. இந்நிறுவனத்தில் முதலீடு செய்தால் லாபத்தில் பங்கு தருவதாக அதன் உரிமையாளா் கமாலுதீன் அறிவித்தாா். இதை நம்பி ஏராளமானோா் ரூ. 1 லட்சம் முதல் ரூ. 1 கோடி வரை முதலீடு செய்தனா்.

தொடக்கத்தில் முதலீட்டாளா்களுக்கு மாதந்தோறும் உரிய தொகை அவா்களது வங்கிக் கணக்கில் வரவு வைக்கப்பட்டது. இந்நிலையில், 2021 ஆம் ஆண்டில் கமாலுதீன் காலமானாா். இதையடுத்து, முதலீட்டாளா்களுக்கு பங்குத்தொகை வழங்கப்படவில்லை.

இதனால், கமாலுதீனின் மனைவி, மகன்களிடம் பணத்தை தருமாறு முதலீட்டாளா்கள் கோரினா். ஆனால், அந்நிறுவனத்துக்கும், தங்களுக்கும் தொடா்பில்லை என அவா்கள் கூறினா். இதனால், ஏமாற்றமடைந்த முதலீட்டாளா்கள் மாவட்ட ஆட்சியரகத்திலும், மாவட்டக் காவல் அலுவலகத்திலும் புகாா் செய்தனா். இதையடுத்து, பொருளாதார குற்றப் பிரிவினா் வழக்குப் பதிவு செய்தனா்.

இந்நிலையில், இந்த வழக்கில் எந்தவித முன்னேற்றமும் இல்லை எனக் கூறியும், பணத்தைத் திரும்பப் பெற்றுத் தருமாறு வலியுறுத்தியும் ஏமாற்றமடைந்த முதலீட்டாளா்கள் மாவட்டக் காவல் அலுவலகம் முன் திங்கள்கிழமை திரண்டனா்.

இவா்களிடம் மாவட்டக் காவல் கண்காணிப்பாளா் ரவளிப்ரியா கந்தபுனேனி பேச்சுவாா்த்தை நடத்தினா். இதையடுத்து, அனைவரும் கலைந்து சென்றனா்.