நெல், கரும்பு போல, தேங்காய்களையும் அரசே கொள்முதல் செய்ய வேண்டும் என தஞ்சாவூா் ஆட்சியரகத்தில் வெள்ளிக்கிழமை நடைபெற்ற விவசாயிகள் குறைகேட்பு நாள் கூட்டத்தில் வலியுறுத்தப்பட்டது.

மாவட்ட ஆட்சியா் தினேஷ் பொன்ராஜ் ஆலிவா் தலைமையில் நடைபெற்ற இக்கூட்டத்தில் விவசாயிகளின் கருத்துகள்:

சுவாமிமலை சுந்தர. விமல்நாதன்: கடந்த 2021 - 22 ஆம் ஆண்டில் குறுவை, சம்பா, தாளடிப் பயிா்க் காப்பீடு செய்தவா்களுக்கு இதுவரை இழப்பீட்டுத் தொகை அறிவிக்கப்படாமலும், வழங்கப்படாமலும் உள்ளன. இவா்களுக்கு கால தாமதத்துக்கான வட்டியுடன் இழப்பீட்டுத் தொகை வழங்க வேண்டும்.

பொன்னவராயன்கோட்டை வா. வீரசேனன்: காவிரியில் தண்ணீா் வந்தாலும் சாகுபடி செய்வதற்குப்

பயிா்க்கடன் வேண்டும். இதற்காக வங்கியை நாடும்போது அடங்கல் சான்று கேட்கின்றனா். கடந்த ஆண்டு அடங்கல் சான்று கிடைக்காததால் விவசாயிகள் மிகுந்த சிரமத்துக்கு ஆளாகினா்.

ஆட்சியா்: நிகழாண்டு அடங்கல் வழங்குமாறு அனைத்து வட்டாட்சியா்களுக்கும் அறிவுறுத்தப்படும்.

தோழகிரிப்பட்டி கோவிந்தராஜ்: குருங்குளம் அறிஞா் அண்ணா சா்க்கரை ஆலையில் பிற்பகுதியில் கரும்பு வழங்கிய விவசாயிகளுக்கு இன்னும் பணம் கிடைக்கவில்லை. இத்தொகையை விரைவில் வழங்க வேண்டும்.

ஆட்சியா்: இந்த ஆலை விவசாயிகள் வழங்கிய கரும்பில் சா்க்கரை கட்டுமானம் 9.22 சதவிகிதம் எட்டியிருக்கிறது. இந்த சாதனை படைத்த விவசாயிகளுக்கு நன்றியும், பாராட்டும் தெரிவித்துக் கொள்கிறேன்.

ராயமுண்டான்பட்டி என்.வி. கண்ணன்: மேட்டூா் அணை முன்னதாக திறக்கப்பட்டுள்ள நிலையில், காவிரி நீா் வருவதற்குள்ளாகத் தூா் வாரும் பணியைக் கடைமடைப் பகுதி வரை செய்ய வேண்டும்.

அம்மையகரம் ஏ.கே.ஆா். ரவிச்சந்தா்: கடைமடைப் பகுதி வரை தண்ணீா் செல்லும் வகையில் தூா் வாரும் பணி செய்ய வேண்டும் என கோரிக்கை விடுத்து வருகிறோம். ஆனால், இப்போது நடைபெறும் தூா் வாரும் பணியில் முறைகேடு நிகழ்கிறது.

ஆட்சியா்: மாவட்டத்தில் மேற்கொள்ளப்படும் 117 தூா் வாரும் பணிகளில் 40 பணிகளை நானே நேரில் சென்று ஆய்வு செய்தேன். அவற்றில் எதிலும் முறைகேடு இல்லை. முறைகேடுகளை அனுமதிக்கமாட்டோம்.

ஆம்பலாப்பட்டு அ. தங்கவேல்: நல்ல தரமான விதை விதைத்தால்தான் விளைச்சல் நன்றாக இருக்கும். ஆனால், பட்டுக்கோட்டை பகுதியில் விதை நெல்லில் புறத்தூய்மை அகற்றப்படாமல் தனியாா் கடைகளில் விற்பனை செய்யப்படுகிறது. இதனால், விளைச்சல் பாதிக்கப்படும் நிலை உள்ளது.

மல்லிப்பட்டினம் ஏ. கமால்பாட்சா: நெல், கரும்புக்கு அடுத்து பெரிய அளவில் தென்னை சாகுபடி மேற்கொள்ளப்படுகிறது. ஆனால், கடந்த ஆண்டு தேங்காய் ரூ. 22-க்கு விற்பனை செய்யப்பட்ட நிலையில், நிகழாண்டு ரூ. 8-க்கு விலை கேட்க ஆளில்லை. இதனால், தென்னை விவசாயிகள் மிகுந்த பாதிப்புக்கு ஆளாகியுள்ளனா். எனவே, நெல், கரும்பு போல தேங்காய்களையும் அரசே கொள்முதல் செய்ய நடவடிக்கை எடுக்கப்பட வேண்டும்.

மதுக்கூா் ராமச்சந்திரன்: தேங்காய் விலை வீழ்ச்சியால் தென்னை விவசாயிகள் மிகுந்த பாதிப்புக்கு ஆளாகியுள்ளனா். இதுதொடா்பாக அரசு நடவடிக்கை எடுக்க வேண்டும்.

தேங்காய்களை உடைத்து போராட்டம்:

கூட்டம் தொடங்குவதற்கு முன்பாக, தேங்காய் விலை வீழ்ச்சியை வெளிப்படுத்தும் வகையில், ஆட்சியரக வளாகத்தில் விவசாயிகள் தேங்காய்களை உடைத்து போராட்டத்தில் ஈடுபட்டனா். இதில், ஏராளமான விவசாயிகள் கலந்து கொண்டு தேங்காய்களை அரசே கொள்முதல் செய்ய வலியுறுத்தி முழக்கங்கள் எழுப்பினா்.