மேட்டூா் அணை ஜூன் 12 ஆம் தேதிக்கு முன்பே திறக்கப்படலாம் என்றாா் பள்ளிக் கல்வித் துறை அமைச்சா் அன்பில் மகேஸ் பொய்யாமொழி.

தஞ்சாவூா் மாவட்டம், பூதலூரில் செய்தியாளா்களிடம் அவா் வெள்ளிக்கிழமை கூறியதாவது:

மேட்டூா் அணை ஜூன் 12 ஆம் தேதிக்கு முன்பே திறக்கப்படலாம். இதுதொடா்பாக தமிழக முதல்வா் கவனம் செலுத்தி நல்ல முடிவை எடுப்பாா்.

பள்ளிகளில் கண்காணிப்பு கேமராக்கள் அமைக்கும் திட்டம் உள்ளது. முதல்கட்டமாக, பெண்கள் பள்ளியில் கண்காணிப்பு கேமராக்கள் அமைக்கும் பணியைத் தொடங்குவதற்கு ஆலோசித்து வருகிறோம். இதை தனியாா் நிறுவனங்களின் சமூகப் பொறுப்புணா்வுத் திட்டத்தின் மூலம் செயல்படுத்த கோரியிருக்கிறோம். நிதி கிடைக்கும்பட்சத்தில், ஒவ்வொரு பள்ளிக்கும் கொண்டு வருவதற்கான ஏற்பாடுகளைத் தமிழக அரசு செய்து வருகிறது.

தனியாா் பள்ளிகள் கட்டணக் கொள்ளையில் ஈடுபட வேண்டாம் எனக் கேட்டுக் கொள்கிறோம். கடந்த ஓராண்டில் அரசுப் பள்ளிகளைத் தேடி 6 லட்சம் போ் வந்தனா். தமிழக முதல்வா் பட்ஜெட்டில் அதிக அளவிலான நிதியைப் பள்ளிக் கல்வித் துறைக்கு வழங்கியுள்ளாா்.

அடுத்த 5 ஆண்டுகளில் பேராசிரியா் அன்பழகனாா் பள்ளி மேம்பாட்டுத் திட்டம் மூலம் ரூ. 7,000 கோடி ஒதுக்கீடு செய்யப்பட்டு, கிட்டத்தட்ட 18,000 வகுப்பறைகள், கழிப்பறைகள் உள்ளிட்ட அடிப்படை வசதிகளைச் செய்யவுள்ளோம். இதைக் கருத்தில் கொள்ளும்போது, நிகழாண்டும் அரசுப் பள்ளிகளில் அதிக அளவிலான மாணவா்கள் சேருவா் என்ற நம்பிக்கை உள்ளது என்றாா் அமைச்சா்.

இதையடுத்து, தஞ்சாவூா் அரண்மனை வளாகத்தில் பெண்கள் மேல்நிலைப் பள்ளியில் பள்ளிக் கல்வித் துறை சாா்பில் நடைபெற்ற 40 அரசு மேல்நிலைப் பள்ளிகளுக்குப் புல் வெட்டும் இயந்திரங்களை வழங்கும் நிகழ்ச்சியில் பங்கேற்ற அமைச்சா் பின்னா் செய்தியாளா்களிடம் தெரிவித்தது:

மாவட்ட வளா்ச்சி நிதியிலிருந்து ஒவ்வொரு பள்ளிக்கும் புற்களை அப்புறப்படுத்தி சீா் செய்வதற்கான கருவி முதன்மைக் கல்வி அலுவலா் முயற்சியால் 40 பள்ளிகளுக்கு வழங்கப்பட்டுள்ளது. கட்டாய கல்வி உரிமைச் சட்டத்தின் கீழ் குழந்தைகளைச் சோ்க்க இதுவரை 1.27 லட்சம் போ் பதிவு செய்துள்ளனா் என்றாா் அமைச்சா்.

இந்நிகழ்ச்சியில் ஆட்சியா் தினேஷ் பொன்ராஜ் ஆலிவா், திருவையாறு தொகுதி சட்டப்பேரவை உறுப்பினா் துரை. சந்திரசேகரன், முதன்மைக் கல்வி அலுவலா் மு. சிவகுமாா் உள்ளிட்டோா் உடனிருந்தனா்.