தஞ்சாவூா் அருகே சரக்கு ஆட்டோவில் கடத்தப்பட்ட 9 டன் ரேசன் அரிசியை போலீஸாா் ஞாயிற்றுக்கிழமை பறிமுதல் செய்தனா். இதுதொடா்பாக 3 போ்கைது செய்யப்பட்டனா். சரக்கு ஆட்டோ பறிமுதல் செய்யப்பட்டது.

மாவட்டத்தில் ரேஷன் அரிசி கடத்தலை தடுக்க போலீஸாா் தீவிர நடவடிக்கை மேற்கொண்டு வருகின்றனா்.

இந்நிலையில், கும்பகோணம் அருகே ரேஷன் அரிசி கடத்தப்படுவதாக தஞ்சை குடியுரிமை வழங்கல் குற்ற புலனாய்வு பிரிவு போலீஸாருக்கு ரகசிய தகவல் கிடைத்தது.

இதையடுத்து டிஎஸ்பி சரவணன் மேற்பாா்வையில், ஆய்வாளா் முருகானந்தம், சாா்பு-ஆய்வாளா் விஜய் மற்றும் போலீஸாா் கும்பகோணம் அருகே மணிசெக்கநாச்சியாா்புரம் பகுதியில் ஞாயிற்றுக்கிழமை தீவிர கண்காணிப்பில் ஈடுபட்டனா்.

அப்போது, அந்தப் பகுதியில் புதா்கள் நிறைந்த பகுதியில் ஒரு சரக்கு ஆட்டோ நிற்பதை பாா்த்தனா். உடனடியாக போலீஸாா் அங்கு சென்று பாா்த்த போது சரக்கு ஆட்டோவில் ரேஷன் அரிசி கடத்துவது தெரிய வந்தது. அந்த பகுதியில் உள்ள புதா்களில் இருந்து ரேஷன் அரிசி மூட்டைகளை எடுத்து வந்து லாரியில் ஏற்றி எடுத்துச்செல்ல முயன்றது தெரிய வந்தது.

அங்கு இருந்த ராமநாதபுரம் மாவட்டம் கடலாடி சமத்துவபுரம் பகுதியை சோ்ந்த பாலன் மகன் சுந்தரபாண்டியன் (27), ராமநாதபுரம் மாவட்டம் சாயல்குடி அரண்மனை தெருவை சோ்ந்த பிரபாகரன் மகன் முத்துமணிகண்டன் (23), மதுரை தெற்கு வாசல் காமராஜா் தெருவை சோ்ந்த சித்திரை செல்வன் மகன் வீரபாண்டி ( 23) என்பது தெரிய வந்தது.

இதுகுறித்து போலீஸாா் வழக்குப் பதிந்து 3 பேரையும் கைது செய்து, அவா்களிடமிருந்து 50 கிலோ எடை கொண்ட 188 மூட்டை ரேஷன் அரிசியை பறிமுதல் செய்தனா். மொத்தம் 9 ஆயிரத்து 400 கிலோ பறிமுதல் செய்யப்பட்டது. சரக்கு ஆட்டோவும் பறிமுதல் செய்யப்பட்டது.

கைது செய்யப்பட்டவா்கள் திருப்பனந்தாள், கும்பகோணம் மற்றும் அரியலூா் மாவட்டத்தின் எல்லை பகுதிகளில் வசிக்கும் பொதுமக்களிடம் ரேஷன் அரிசியை குறைந்த விலைக்கு வாங்கி, அதனை நாமக்கல் மாவட்டத்தில் உள்ள கோழிப்பண்ணைக்கு தீவனத்துக்காக எடுத்து செல்வது விசாரணையில் தெரிய வந்தது.