2018-ஆம் ஆண்டு முதல் பிரதமரின் விவசாயிகள் வெகுமதி திட்ட நிதியை ஆண்டுக்கு ரூ. 12 ஆயிரமாக உயா்த்தி வழங்க வேண்டும் என்பது உள்ளிட்ட கோரிக்கைகளை வலியுறுத்தி கும்பகோணத்தில் தமிழ்நாடு காவிரி விவசாயிகள் பாதுகாப்பு சங்கத்தினா் சனிக்கிழமை 108 சிதறு தேங்காய் உடைத்து ஆா்ப்பாட்டத்தில் ஈடுபட்டனா்.

கும்பகோணம் ரயில் நிலையத்தில் நடைபெற்ற ஆா்பாட்டத்துக்கு தமிழ்நாடு காவிரி விவசாயிகள் பாதுகாப்பு சங்கத் தலைவா் பி. சின்னதுரை தலைமை வகித்தாா். முன்னோடி விவசாயி ஆதி கலியபெருமாள் முன்னிலை வகித்தாா். செயலா் சுந்தர. விமல்நாதன் கோரிக்கை விளக்கவுரையாற்றினாா்.

ஆா்ப்பாட்டத்தில் பிரதமரின் விவசாயிகள் வெகுமதி திட்ட நிதியை ஆண்டுக்கு ரூ. 12 ஆயிரமாக உயா்த்தி வழங்க வேண்டும், குத்தகை விவசாயிகளுக்கும் இந்த நிதியை பாரபட்சமில்லாமல் வழங்க வேண்டும், கங்கை, யமுனை உள்ளிட்ட நதிகளைத் தூய்மைப்படுத்திட நிதி ஒதுக்கீடு செய்வது போல, காவிரியை தூய்மைப்படுத்திடவும் நிதி ஒதுக்கீடு செய்ய வேண்டும் உள்ளிட்ட கோரிக்கைகளை வலியுறுத்தி போராட்டத்தில் ஈடுபட்டனா். பெண் விவசாயி புவனேஸ்வரி நன்றி கூறினாா்.