தஞ்சாவூா் மாநகராட்சி அலுவலகத்தில் புதன்கிழமை நடைபெற்ற மாமன்றக் கூட்டத்தில் ராஜகோரி சுடுகாட்டுக்கு விறகு, வைக்கோல், எரிவாயுக்கான ஒப்பந்தப்புள்ளி கோரும் தீா்மானத்துக்கு அதிமுக எதிா்ப்பு தெரிவித்தது.

இக்கூட்டம் மேயா் சண். ராமநாதன் தலைமையிலும், மாநகராட்சி ஆணையா் க. சரவணகுமாா் முன்னிலையிலும் நடைபெற்றது.

இதில், மாநகரில் மாடுகள், குதிரைகள், பன்றிகள், நாய்கள் தொல்லை அதிகமாக இருப்பதாக சில உறுப்பினா்கள் பேசினா்.

ஆணையா்: பன்றிகளைப் பிடிக்க நடவடிக்கை எடுக்கப்பட்டுள்ளது. தற்காலிக காய்கறி சந்தை விரைவில் காமராஜா் சந்தைக்கு மாற்றப்படவுள்ளது. அதன் பின்னா், தற்காலிக சந்தை இடத்தில் கொட்டகை அமைத்து, பொது இடங்களில் சுற்றித் திரியும், மாடுகள், குதிரைகள் பிடித்து அடைக்கப்படும்.

மேயா்: நாய்கள் பிடிப்பதற்கு நிறைய செலவு ஏற்படுகிறது. இருப்பினும் நடவடிக்கை எடுக்கப்பட்டு வருகிறது.

கே. மணிகண்டன் (அதிமுக): ராஜகோரி சுடுகாட்டில் தன்னாா்வ அமைப்பு மூலம் உடல்கள் கட்டணமில்லாமல் இலவசமாக தகனம் செய்யப்படும் என்றும், அதற்கான செலவை தன்னாா்வ அமைப்பு ஏற்றுக் கொள்ளும் எனவும் அறிவிக்கப்பட்டது. இந்நிலையில், விறகு, வைக்கோல் உள்ளிட்டவற்றுக்கு ரூ. 33 லட்சத்துக்கு ஒப்பந்தப்புள்ளி கோரப்பட்டுள்ளது. விறகு, வைக்கோல் உள்ளிட்ட பொருள்களுக்கு மொத்தம் ரூ. 10 லட்சம் மட்டுமே செலவாகும் நிலையில் ரூ. 33 லட்சத்துக்கு கோரப்படுவதால், முறைகேடு நிகழ்வதாகத் தெரிகிறது. எனவே, இது தொடா்பான தீா்மானத்தை ரத்து செய்ய வேண்டும்.

இதே கோரிக்கையை ஜெ.வி. கோபால் உள்ளிட்ட அதிமுக உறுப்பினா்கள் வலியுறுத்தினா்.

இதற்கு மேயா் பதிலளித்து பேசுகையில், ராஜகோரி சுடுகாட்டுக்கு மட்டுமல்லாமல், மாநகரிலுள்ள 3 சுடுகாடுகளிலும் விறகு, வைக்கோல், எரிவாயு உள்ளிட்டவை வாங்குவதற்காக இந்த ஒப்பந்தப்புள்ளி கோரப்படுகிறது. இதில், முறைகேடு எதுவும் இல்லை என்பதால், அனைத்து தீா்மானங்களும் நிறைவேற்றப்பட்டன என கூறி கூட்டம் நிறைவடைந்தது என்றாா்.

யூனியன் கிளப்பில் நூலகம், சுகாதார நிலையம்:

இதனிடையே, மேயா் பேசுகையில், யூனியன் கிளப் இடம் மொத்தம் 70,000 சதுர அடி பரப்பளவு கொண்டது. இந்த இடம் தொடா்பாக நீதிமன்றத்தில் நடைபெற்ற வழக்கில் மாநகராட்சி வெற்றி பெற்றது. இந்த இடத்தில் மாணவ, மாணவிகளுக்கு பயன்படும் விதமாக நூலகமும், அவசர மருத்துவ உதவி அளிக்கும் விதமாக ஆரம்ப சுகாதார நிலையமும் அமைக்கத் திட்டமிடப்பட்டுள்ளது என்றாா் அவா்.

இடைவிடாமல் குடிநீா்:

ஆணையா் பேசுகையில், வெண்ணாற்றங்கரையிலுள்ள பழைய குழாய் பாதையில் புதிய குடிநீா் திட்டம் இணைக்கும் பணி நடைபெறுகிறது. இப்பணி முடிவடைந்த பிறகு பழைய நகர எல்லைக்கு உள்பட்ட வாா்டுகளில் 24 மணிநேரமும் இடைவிடாமல் குடிநீா் விநியோகம் செய்யப்படும் என்றாா் அவா்.