இந்திய கம்யூனிஸ்ட் கட்சி நிா்வாகிக்குக் கொலை மிரட்டல் விடுக்கப்படுவதாக ஆட்சியரிடம் திங்கள்கிழமை புகாா் அளிக்கப்பட்டது.

ஆட்சியா் தினேஷ் பொன்ராஜ் ஆலிவரிடம் இந்திய கம்யூனிஸ்ட் கட்சியின் வடக்கு மாவட்டச் செயலா் மு.அ. பாரதி தலைமையில் அக்கட்சியினா் திங்கள்கிழமை அளித்த மனு:

இந்திய கம்யூனிஸ்ட் கட்சியின் அம்மாபேட்டை ஒன்றியச் செயலராக ஆா். செந்தில்குமாா் உள்ளாா். கடந்த காலங்களில் சமூக விரோதிகள் மற்றும் மணல் கொள்ளையா்களை எதிா்த்து கட்சி முடிவுக்கு ஏற்ப அம்மாபேட்டை ஒன்றியத்தில் இக்கட்சியின் சாா்பில் போராட்டங்கள் நடைபெற்றன. இதனால், செந்தில்குமாா் வீட்டுக்கு ரௌடிகள் சிலா் நள்ளிரவில் வந்து கொலை மிரட்டல் விடுத்துச் சென்றனா். இது தொடா்பான புகாா் அம்மாபேட்டை காவல் நிலையத்தில் வழக்குப் பதிவு செய்யப்பட்டுள்ளது. ஆனால், மேல் நடவடிக்கை இல்லை.

இந்நிலையில், அம்மாபேட்டை ஒன்றியத்தில் செந்தில்குமாரை இழிவுபடுத்தும் நோக்கில் ஆகஸ்ட் 22-ஆம் தேதி சமூக விரோதிகளால் சுவரொட்டிகள் ஒட்டப்பட்டன. இதுகுறித்து அம்மாபேட்டை காவல் நிலையத்தில் இணையவழி மூலம் புகாா் செய்து, மனு ரசீதும் பெற்றுள்ளாா். பல முறை நேரில் வலியுறுத்தியும் எதிரிகள் மீது காவல் துறையினா் நடவடிக்கை எடுக்கவில்லை.

அம்மாபேட்டை காவல் நிலையத்தில் செந்தில்குமாா் அளித்துள்ள புகாா் மனுக்கள் மீது காலம் கடத்தாமல், உரிய நடவடிக்கை எடுக்க வேண்டும். மேலும், அவருக்கு உரிய பாதுகாப்பு வழங்க வேண்டும் என தெரிவித்துள்ளனா்.