மத்திய, மாநில அரசுகளுக்குப் பாலமாக இருக்க வேண்டிய தமிழக ஆளுநா், அவ்விரு அரசுகளுக்கு இடையே சண்டையை மூட்டக் கூடாது என மாநில சட்டத் துறை அமைச்சா் எஸ். ரகுபதி தெரிவித்தாா்.
புதுக்கோட்டையில் சனிக்கிழமை அவா் அளித்த பேட்டி:
பல்கலைக்கழகங்களில் நடைபெற வேண்டிய பட்டமளிப்பு விழாக்களை ஆளுநா் காலதாமதப்படுத்தினாா். இதை உயா்கல்வி அமைச்சரும் மற்ற அமைச்சா்களும் வெளிப்படுத்தினா். தற்போது விழாக்களுக்கான தேதிகளை ஆளுநா் வெளியிட்டுள்ளாா்.
குடியரசுத் தலைவரையே நீக்க அரசியலமைப்புச் சட்டத்தில் இடம் இருக்கிறது. அவரால் நியமிக்கப்பட்ட ஏஜென்ட்தான் ஆளுநா். மத்திய அரசின் பிரதிநிதிதான் அவா்.
அவா் மத்திய, மாநில அரசுகளுக்குப் பாலமாக இருக்க வேண்டுமே தவிர சண்டை மூட்டுபவராக இருக்கக் கூடாது. மேற்பாா்வை செய்பவராகவும் இருக்கக் கூடாது.
மக்களால் தோ்வு செய்யப்பட்ட அரசுக்கு இணையாக, கருத்தரங்குகளை, கலை நிகழ்ச்சிகளை நடத்தும் பிரச்னை எல்லாம் நீதிமன்றத்துக்குச் சென்றால் அவா் விமா்சனத்துக்கு ஆளாவாா்.
உதயநிதி பங்கேற்பாா்: ஜல்லிக்கட்டு நடத்தத் தடையில்லை என்ற தீா்ப்பைப் பெற்று தந்த முதல்வா் மு.க. ஸ்டாலினுக்கு புதுக்கோட்டையில் ஜல்லிக்கட்டுப் பேரவை சாா்பில் நடைபெற இருந்து தள்ளிப்போன பாராட்டு விழா வரும் ஜூன் 18ஆம் தேதி நடைபெறும், அதில் அமைச்சா் உதயநிதி ஸ்டாலின் பங்கேற்பாா் என்றாா் அமைச்சா் எஸ். ரகுபதி.