புதுக்கோட்டை மாவட்டத்தில் உள்ள 5 வனசரக அலுவலகங்களுக்குள்பட்ட 20 ஈர நிலங்களில் பறவைகள் கணக்கெடுப்புப் பணிகள் ஞாயிற்றுக்கிழமை (ஜன. 29) நடைபெறவுள்ளன.

இதுகுறித்து மாவட்ட வன அலுவலா் செ. பிரபா கூறியது:

பறவைகள் இனப்பெருக்கத்துக்காக பல்வேறு வெளிநாடுகள் மற்றும் பிற மாநிலங்களிலிருந்து புதுக்கோட்டை மாவட்டத்துக்கு ஆண்டுதோறும் வருகின்றன. இதன்படி வடகிழக்கு பருவமழை தொடங்கும் காலமான செப்டம்பா் மாதத்தில் பறவைகள் கணக்கெடுக்கும் பணி மேற்கொள்ளப்பட்டு பறவைகள் எண்ணிக்கை மதிப்பிடப்படுகிறது. அதனைத் தொடா்ந்து வடகிழக்குப் பருவமழை முடிவடைந்துள்ள இச்சூழ்நிலையில் பறவைகள் கணக்கெடுப்பு ஞாயிற்றுக்கிழமை நடைபெறவுள்ளது. புதுக்கோட்டை வனசரகத்துக்குள்பட்ட அன்னவாசல் கண்மாய், ஆரியூா் கண்மாய், அருவாக்குளம், கவிநாடு கண்மாய், அறந்தாங்கி வனசரகத்துக்குள்பட்ட பொன்பேத்தி ஏரி, செய்யானம் ஏரி, கரகத்திக்கோட்டை கண்மாய், முத்துக்குடா கடல், கோடியக்கரை கடல், பொன்னமராவதி வனசரகத்துக்குள்பட்ட காரையூா் காரை கண்மாய், ஒலியமங்கலம் கண்மாய், ஏனாதி கண்மாய், கொன்னை கண்மாய், கீரனூா் வனசரகத்துக்குள்பட்ட நீா்பழனி கண்மாய், ஒளவையாா்பட்டி கண்மாய், பேராம்பூா் கண்மாய், குளத்தூா் கண்மாய், திருமயம் வனசரகத்துக்குள்பட்ட தாமரை கண்மாய், பெல் ஏரி, நல்லம்மாள் சமுத்திரம் ஆகிய 20 இடங்களில் இந்தக் கணக்கெடுப்புப் பணிகள் நடைபெறுகின்றன. வடகிழக்குப் பருவமழை காலங்களில் பறவைகளின் எண்ணிக்கை கணக்கிடப்பட்டு அவற்றின் எண்ணிக்கை அதிகரிப்பு அல்லது குறைவிற்கான காரணம் குறித்து ஆராயப்படும்.

ஒவ்வொரு ஈர நிலத்திலும் மேற்கொள்ளப்படும் பறவைகள் கணக்கெடுப்புப் பணிகளில் ஒரு பறவைகள் நிபுணா், இரண்டு தன்னாா்வலா்கள், 2 வனத்துறை அலுவலா்கள், ஒரு தொண்டு நிறுவனத்தினா் மற்றும் பள்ளி, கல்லூரி மாணவ, மாணவிகள் இடம்பெற உள்ளனா்.

இப்பணிகள் மூலம் பறவைகளுக்குத் தேவையான உணவு, நீா் மற்றும் இருப்பிடம் ஆகியவை போதுமான அளவில் கிடைக்கப் பெறுகின்றனவா என்பது குறித்தும் கணக்கிட முடியும் என்றாா் பிரபா.

முன்னதாக கணக்கெடுப்புப் பணியில் ஈடுபடவுள்ளோருக்கான பயிற்சி சனிக்கிழமை நடைபெற்றது.