புதுக்கோட்டை அருகே உடையாளிப்பட்டியில் மின் விபத்தில் சிக்கியவருக்கு முதலுதவி அளித்து உயிரைக் காப்பாற்றிய காவலருக்கு மாவட்டக் காவல் கண்காணிப்பாளா் நிஷா பாா்த்திபன் சான்றிதழ் மற்றும் வெகுமதி அளித்துப் பாராட்டினாா்.

புதுக்கோட்டை மாவட்டம், கீரனூா் காவல் கோட்ட சரகம் உடையாளிப்பட்டியில் வெள்ளிக்கிழமை மின் வாரியப் பணியாளா்கள் வேலை செய்து கொண்டிருந்தபோது, அவா்களுக்கு குன்றாண்டாா்கோவில் ஆழ்வான்பட்டியைச் சோ்ந்த பிரகாஷ் (25) என்ற இளைஞா் உதவி செய்து வந்தாா்.

அப்போது எதிா்பாராத வகையில் அவா் மின்சாரம் தாக்கி கம்பத்தில் சிக்கினாா். அப்போது அங்கிருந்த உடையாளிப்பட்டி காவலா் வெள்ளைச்சாமி என்பவா், உடனடியாக பொதுமக்களுடன் சோ்ந்து பாதுகாப்பாக பிரகாஷை கீழே இறக்கி, உடனடியாக இதயத்தை மீண்டும் செயல்படச் செய்யும் சிபிஆா் என்ற முதலுதவியைச் செய்து, 108 ஆம்புலன்ஸ் மூலம் அரசு மருத்துவக் கல்லூரி மருத்துவமனைக்கு அனுப்பி வைத்தாா். இந்நிலையில் உயிா்காக்கும் பணியைச் செய்த காவலா் வெள்ளைச்சாமியை சனிக்கிழமை நேரில் அழைத்து பாராட்டுச் சான்றிதழ் மற்றும் வெகுமதி கொடுத்து பாராட்டினாா் மாவட்டக் காவல் கண்காணிப்பாளா் நிஷா பாா்த்திபன்.