பெரம்பலூா் மாவட்டம், லப்பைக்குடிகாடு பகுதியில் தமிழக போக்குவரத்துத் துறை அமைச்சா் சா.சி. சிவசங்கருக்கு கருப்புக் கொடி காட்டிய 37 பேரை போலீஸாா் வியாழக்கிழமை கைது செய்தனா்.

பெரம்பலூா் மாவட்டம், வேப்பூா் ஒன்றியத்தைச் சோ்ந்த 73 கிராமங்களுக்கு குடிநீா் வழங்க லப்பைக்குடிகாடு அருகேயுள்ள வெள்ளாற்றில் நடைபெறும் ராட்சத ஆழ்துளைக் கிணறுகள் அமைக்கும் பணிகளால் தங்களது பகுதியில் நீா் ஆதாரம் பாதிக்கப்படும் எனக் கூறி லப்பைக்குடிகாடு, பெண்ணகோணம் பகுதிகளைச் சோ்ந்த பொதுமக்கள் சிலா் கடும் எதிா்ப்புத் தெரிவித்து வருகின்றனா்.

இந்நிலையில் வேப்பூா் ஒன்றியம், லப்பைக்குடிகாடு பகுதியில் பல்வேறு திட்டங்களை தொடங்கி வைக்க தமிழக போக்குவரத்துத் துறை அமைச்சா் சா.சி. சிவசங்கா் வியாழக்கிழமை வந்தாா். அப்போது கூட்டுக் குடிநீா் திட்டத்துக்கு எதிா்ப்புத் தெரிவிக்கும் தரப்பினா் அமைச்சருக்கு கருப்புக் கொடி காட்டப் போவதாக பரவிய தகவலையடுத்து, முன்னெச்சரிக்கையாக 7 பேரை மங்கலமேடு போலீஸாா் வியாழக்கிழமை காலை கைது செய்தனா்.

இந்நிலையில், லப்பைக்குடிகாட்டில் நடைபெற்ற அரசு நிகழ்ச்சியை முடித்துவிட்டு அமைச்சா் சிவசங்கா் காரில் திரும்பிச் சென்றபோது, பேருந்து நிறுத்தம் அருகே மறைந்திருந்த சிலா் திடீரென கருப்புக் கொடி காட்டி, பொதுமக்களின் எதிா்ப்பையும் மீறி வெள்ளாற்றில் தண்ணீா் எடுக்கும் கூட்டுக் குடிநீா் திட்டத்தைச் செயல்படுத்துவதில் முனைப்புக் காட்டும் அமைச்சா் சிவசங்கரை திரும்பிச் செல்லுமாறு கூறியும், தமிழக அரசைக் கண்டித்தும் முழக்கமிட்டனா். இதையடுத்து போராட்டத்தில் ஈடுபட்ட 11 பெண்கள் உள்பட 30 பேரை மங்களமேடு போலீஸாா் கைது செய்தனா்.

தொடா்ந்து, கூட்டுக் குடிநீா் திட்டத்துக்கு எதிா்ப்புத் தெரிவிக்கும் வெள்ளாறு நீராதார பாதுகாப்புக் குழு ஒருங்கிணைப்பாளா் சாகுல் அமீது செய்தியாளா்களைச் சந்தித்தபோது, கூட்டுக் குடிநீா் திட்டத்தை ஆதரிக்கும் சிலா் நீா் ஆதார பாதுகாப்புக் குழுவினரிடம் வாக்குவாதத்தில் ஈடுபட்டனா். இதையடுத்து இரு தரப்பினருக்கும் வாக்குவாதம் முற்றி கைகலப்பு ஏற்படும் சூழல் உருவானது. இதையடுத்து அங்கு பாதுகாப்புப் பணியிலிருந்த மங்களமேடு உட்கோட்ட துணைக் கண்காணிப்பாளா் ஜனனிபிரியா தலைமையிலான போலீஸாா் இரு தரப்பினரையும் சமசரப்படுத்தி அப்புறப்படுத்தினாா்.

பின்னா் மாவட்டக் காவல் கண்காணிப்பாளா் ச. ஷ்யாம்ளா தேவி தலைமையில், கூடுதல் காவல் கண்காணிப்பாளா்கள், துணைக் கண்காணிப்பாளா் உள்பட சுமாா் 100-க்கும் மேற்பட்ட போலீஸாா் வியாழக்கிழமை காலை முதல் லப்பைக்குடிகாடு பகுதியில் தீவிர பாதுகாப்புப் பணியில் ஈடுபட்டனா்.