பெரம்பலூா் அருகே உள்ள வேலூா் அரசு உயா்நிலைப் பள்ளியில், இளையோா் செஞ்சிலுவை சங்கம் சாா்பில் மனித நேயம் மற்றும் எய்ட்ஸ் விழிப்புணா்வுப் பேரணி வெள்ளிக்கிழமை நடைபெற்றது.

பட்டதாரி ஆசிரியா் வே. துரை முன்னிலையில், பள்ளித் தலைமை ஆசிரியா் சே. ராஜேந்திரன் கொடியசைத்து பேரணியை தொடக்கி வைத்தாா்.

பள்ளி வளாகத்தில் தொடங்கிய இப்பேரணி வேலூா் கிராமத்தின் முக்கிய வீதிகள் வழியாகச் சென்று, மீண்டும் பள்ளி வளாகத்தில் நிறைவடைந்தது.

இப்பேரணியில் பங்கேற்ற 100-க்கும் மேற்பட்ட பள்ளி மாணவ, மாணவிகள் விழிப்புணா்வு பதாகைகளை ஏந்தி, பொது மக்களுக்கு துண்டுப் பிரசுரங்கள் வழங்கி மனித நேயம் மற்றும் எய்ட்ஸ் குறித்து விழிப்புணா்வு ஏற்படுத்தினா்.

இதில், பட்டதாரி ஆசிரியா்கள் ரெ. அன்பரசி, பொ.சு. வெண்ணிலா உள்பட பலா் கலந்து கொண்டனா்.

முன்னதாக, இளையோா் செஞ்சிலுவை சங்க உறுப்பினா் அமுதன் வரவேற்றாா். நிறைவாக, பட்டதாரி ஆசிரியை நிா்மலா நன்றி கூறினாா்.