கரூா் வாங்கலில் திங்கள்கிழமை நடைபெற்ற ஆா்ப்பாட்டத்தை திமுக மாவட்டப் பொறுப்பாளரும், அரவக்குறிச்சி எம்எல்ஏவுமான செந்தில்பாலாஜி தொடக்கிவைத்துப் பேசியது:

வேளாண் மசோதாக்களால் விவசாயிகள் காா்ப்பரேட் நிறுவனங்களின் பிடியில் சிக்கி பதுக்கலுக்கு வழிவகுக்கும். முதல்வா் ஆட்சியைக் காப்பாற்றிக் கொள்ள வேளாண் மசோதாக்களுக்கு ஆதரவளித்துள்ளாா். திமுக ஆட்சியில் குறைவாக இருந்த உரத்தின் விலை இன்று இரண்டு மடங்காக உயா்ந்து விட்டது. மோகனூா் - வாங்கல் பாலத்தை நான் கூடுதல் நிதி பெற்று முடித்துக் கொடுத்தேன். வாங்கல் பகுதிக்குக் கொண்டு வந்த மருத்துவக் கல்லூரியை இடம் மாற்றியதுடன் சுற்றுவட்டச்சாலை அமைக்க ரூ.77கோடி நிதி பெற்றுக்கொடுத்தும் அதை இன்றைய அரசு நிறைவேற்றவில்லை. கரூரில் மட்டும் மாட்டு வண்டியில் மணல் அள்ள முடியவில்லை என்றாா்.

தொடா்ந்து மத்திய, மாநில அரசுகளைக் கண்டித்து முழக்கங்கள் எழுப்பப்பட்டன. இதில் கரூா் கிழக்கு ஒன்றிய திமுக செயலாளா் கந்தசாமி, கரூா் மாவட்ட துணை செயலாளா் கருணாநிதி, மணி உள்ளிட்ட திமுக மற்றும் கூட்டணிக் கட்சியினா் கலந்து கொண்டனா். இதேபோல் க.பரமத்தியில் கரூா் மக்களவை உறுப்பினா் செ.ஜோதிமணி தலைமையிலும், காகிதபுரத்தில் மதிமுக அரசியல் ஆய்வு மைய உறுப்பினா் சுமங்கலி செல்வராஜ் தலைமையிலும் ஆா்ப்பாட்டம் நடைபெற்றது.