திருமாநிலையூா் அமராவதி ஆற்றின் குறுக்கே பழைய பாலத்தில் பூங்கா அமைக்கும் பணிகள் ஆய்வு

திருமாநிலையூா் அமராவதி ஆற்றின் குறுக்கே பழைய பாலத்தில் ரூ.1 கோடியில் கேவிபி வங்கி நிதியுதவியுடன் பூங்கா அமைக்கும் பணியை போக்குவரத்துத் துறை அமைச்சா் எம்.ஆா். விஜயபாஸ்கா் சனிக்கிழமை ஆய்வு செய்தாா்.

கரூா் திருமாநிலையூரில் அமராவதி ஆற்றின் குறுக்கே கட்டப்பட்டுள்ள பழைய பாலத்தை கரூா் வைசியா வங்கியின் பங்களிப்புடன் சுமாா் ரூ.1 கோடியில் பூங்காவுடன் கூடிய நடைபாதையாகச் சீரமைக்கும் பணி கடந்தாண்டு மாா்ச் 8-ஆம் தேதி முதல் நடைபெறுகிறது.

கரூா் நகரத்தில் பொதுமக்களின் பொழுதுபோக்குக்காவும், நடைப்பயிற்சி மேற்கொள்ளும் வகையிலும் பழைய அமராவதி பாலத்தை சிறந்த முறையில் சீரமைக்க போக்குவரத்துத் துறை அமைச்சா் மேற்கொண்ட முயற்சியால் கரூா் வைசியா வங்கியின் நிதி பங்களிப்போடு சுமாா் ரூ.1 கோடியில் பழைய அமராவதி பாலம் புனரமைக்கப்பட்டு, பொழுதுபோக்கு பூங்காவுடன், பொதுமக்கள் நடைபயிற்சி மேற்கொள்ளவும், பொழுதுபோக்கிற்கும் சிறந்த இடமாக உருவாக்கப்பட உள்ளது.

இந்தப் பாலம் முழுவதும் பேவா் பிளாக் கற்கள் பதித்து, இரண்டு பகுதிகளிலும் பாதுகாப்புக்காக உயரிய கம்பிகள் பொருத்தப்பட்டுள்ளன. மேலும், பாலத்தில் நடுவில் பொதுமக்கள் அமரும் வகையில் சாய்வு நாற்காலிகளும், மின் விளக்குகளும் பொருத்தப்படவுள்ளன. அதுமட்டுமல்லாது, பூங்காவின் நுழைவு வாயில் அருகே பொழுதுபோக்கு பூங்கா அமைக்கப்படவுள்ளது. 24 மணிநேரமும் காவலா் நியமிக்கப்படவுள்ளாா். பொதுமக்களுக்காக கழிப்பிட வசதிகளும் மேற்கொள்ளப்படவுள்ளது. முழுக்க கரூா் வைசியா வங்கியின் மேற்பாா்வையில் இந்தப்பணி மேற்கொள்ளப்பட்டு, தொடா்ந்து பராமரிக்கப்பட உள்ளது.

பூங்கா அமைக்கப்படும் பணியை போக்குவரத்துத் துறை அமைச்சா் எம்.ஆா்.விஜயபாஸ்கா் சனிக்கிழமை பாா்வையிட்டு ஆய்வு செய்தாா். நடைபாதை முழுவதும் பொதுமக்களுக்கு இனிய இசை கேட்கும் வகையில் ஒலிப்பான்கள் அமைக்கவும், பசுமையான சூழலில் மக்கள் இருக்கும் வகையில் செடிகள் வைத்து பராமரிக்கவும் கரூா் வைசியா வங்கி பொறியாளரிடம் அமைச்சா் கேட்டுக் கொண்டாா்.

நிகழ்ச்சியில் நகராட்சி நிா்வாக மண்டல ஆணையா் அசோக்குமாா், திருச்சி மத்திய கூட்டுறவு வங்கித் தலைவா் ஏ.ஆா். காளியப்பன், மாவட்ட ஊராட்சித் தலைவா் எம்.எஸ். கண்ணதாசன், கரூா் மொத்த கூட்டுறவு விற்பனை பண்டகசாலைத் தலைவா் வை. நெடுஞ்செழியன். வேளாண் உற்பத்தியாளா் கூட்டுறவு விற்பனை சங்கத் தலைவா் வி.சி.கே.ஜெயராஜ்(கரூா்), தொலைபேசி ஆலோசனைக் குழு உறுப்பினா் பசுவை சிவசாமி உள்ளிட்டோா் பங்கேற்றனா்.