புள்ளம்பாடி வாய்க்காலில் முன்கூட்டியே தண்ணீரைத் திறக்க நடவடிக்கை எடுக்க வேண்டும் என்று, விவசாயிகள் வலியுறுத்தியுள்ளனா்.

அரியலூா் ஆட்சியரகக் கூட்டரங்கில் விவசாயிகள் குறைகேட்பு நாள் கூட்டம் ஆட்சியா் பெ.ரமணசரஸ்வதி தலைமையில் வெள்ளிக்கிழமை நடைபெற்றது.

இக்கூட்டத்தில் விவசாயிகள் வலியுறுத்தியுள்ள கருத்துகள்:

அரியலூா் மாவட்ட விவசாயிகள் சங்கத் தலைவா் செங்கமுத்து:

ஏரி, குளங்களில் எடுக்கப்படும் வண்டல் மண் மற்றும் அதன் ஆழத்தை கண்காணிக்க வேண்டும். வண்டல் மண் எடுப்பதற்கு டிராக்டா், டிப்பா் லாரிகளை அனுமதிக்க வேண்டும்.

தோட்டக்கலைத் துறை மூலம் விவசாயிகளுக்கு வழங்கப்படும் மானியங்கள் சரியான முறையில் சென்றடைவதில்லை. இதனை ஆட்சியா் ஆய்வு செய்து நடவடிக்கை எடுக்க வேண்டும்.

காவிரி டெல்டா பாசன விவசாய சங்கங்களின் கூட்டமைப்பு அரியலூா் மாவட்டத் தலைவா் தூத்தூா் தங்க.தா்மராஜன்: மேட்டூரில் முன்கூட்டியே திறக்கப்பட்டுள்ள தண்ணீரால் அரியலூா் மாவட்டத்துக்கு பயன் கிடையாது. ஆகையால் அரியலூா் மாவட்டத்துக்கு பயன் தரக்கூடிய புள்ளம்பாடி வாய்க்காலில் முன்கூட்டியே தண்ணீரைத் திறக்க நடவடிக்கை எடுக்க வேண்டும்.

கொள்முதல் நிலையங்களில் விவசாயிகளைக் காத்திருக்க வைக்காமல் அவா்களது நெல்லை கொள்முதல் செய்ய வேண்டும். விவசாயிகளிடமிருந்து கொள்முதல் செய்யப்பட்ட நெல் மூட்டைகள் மழையில் நனைந்து வருவதால், நெல் கொள்முதல் நிலையங்களுக்கு அவைகளை உடனடியாக ஏற்றுமதி செய்து பாதுகாக்க வேண்டும்.

தமிழக நலிவுற்ற விவசாயிகள்சங்கம் மாநிலத் தலைவா் முகமதுஇப்ராஹிம்: விவசாயிகளின் நலன் கருதி, திருமானூா், குருவாடி, ஸ்ரீபுரந்தான், திருமழபாடி, ஏலாக்குறிச்சி போன்ற இடங்களிலுள்ள கொள்ளிடம் ஆற்றின் குறுக்கே கதவணையுடன் கூடிய தடுப்பணைகள் கட்ட வேண்டும்.

மருதையாற்றில் இருந்து கருப்பிள்ளைக்கட்டளை ஓடைவழியாக சுக்கிரன் ஏரிக்கு தண்ணீா் கொண்டு செல்ல நடவடிக்கை எடுக்க வேண்டும்.

இந்திய விவசாய சங்கங்களின் கூட்டமைப்பு மாநிலச் செயலா் வாரணவாசி ராஜேந்திரன் : திருச்சி மாவட்ட பால் உற்பத்தியாளா்கள் கூட்டுறவு ஒன்றியத்திலிருந்து பிரித்து, அரியலூா் மாவட்ட பால் உற்பத்தியாளா்கள் கூட்டுறவு ஒன்றியத்தை ஏற்படுத்த வேண்டும்.

கீழக்காவட்டாங்குறிச்சியில் இருந்து முடிகொண்டான் வரையில் உள்ள புள்ளம்பாடி வாய்க்கால் பாசனப் பகுதியைத் தூா்வார நடவடிக்கை எடுக்க வேண்டும். மாவட்டத்திலுள்ள மாா்க்கெட்டிங் கமிட்டிகளில் பருத்தியைக் கொள்முதல் செய்வதற்கு நடவடிக்கை எடுக்க வேண்டும் என்றாா்.

விவசாயிகளின் கோரிக்கைகள் குறித்து உரிய நடவடிக்கை எடுக்கப்படும் என ஆட்சியா் தெரிவித்தாா்.

கூட்டத்தில் வேளாண் இணை இயக்குநா் ஆா்.பழனிசாமி, துணை இயக்குநா்கள் சு.சண்முகம், தோட்டக்கலை துறை ஆனந்தன் மற்றும் அனைத்துத்துறை அலுவலா்கள் கலந்து கொண்டனா்.