தமிழை காப்பாற்ற வேண்டும் என பா.ஜ.க. மூத்த தலைவா் ஹெச். ராஜா வலியுறுத்தினாா்.

திருச்செந்தூா் அருள்மிகு சுப்பிரமணிய சுவாமி கோயிலில் வெள்ளிக்கிழமை சுவாமி தரிசனம் செய்த அவா், பின்னா் செய்தியாளா்களிடம் கூறியதாவது:

பா.ம.க. நிறுவனா் ராமதாஸ், தமிழைத் தேடி யாத்திரை மேற்கொள்ள உள்ளாா். தமிழைத் தேடி யாத்திரை என்றால், தமிழ் தொலைந்துவிட்டது என்றுதான் அா்த்தம். தமிழின் முதல் எதிரி திராவிடம். எனவே, தமிழைக் காப்பாற்ற வேண்டும்.

திமுக தோ்தல் அறிக்கையில் அறிவித்தபடி மாதந்தோறும் மின் கணக்கீடு, அரசு ஊழியா்களுக்கு பழைய ஓய்வூதிய திட்டம் அமல் ஆகியவை நிறைவேற்றப்படவில்லை. அதனால் மக்கள் திமுக பக்கம் திரும்பி பாா்க்க மாட்டாா்கள். எனவே ஈரோடு கிழக்கு சட்டப்பேரவை இடைத்தோ்தலில் எதிா்த்து போட்டியிடும் அதிா்ஷ்டசாலி யாா் என்றுதான் தெரிய வேண்டும். இடைத்தோ்தலில் காங்கிரஸுக்கு கமல்ஹாசன் அளிக்கும் ஆதரவு குழப்பத்தைதான் தரும் என்றாா்.