தூத்துக்குடி

குளத்தூா் ஊராட்சியில் கிராம சபை: அமைச்சா் பங்கேற்பு

3rd Oct 2022 12:31 AM

ADVERTISEMENT

 

காந்தி ஜெயந்தியை முன்னிட்டு, விளாத்திகுளம் தொகுதி குளத்தூா் ஊராட்சி கெச்சிலாபுரத்தில் கிராமசபை கூட்டம் ஞாயிற்றுக்கிழமை நடைபெற்றது.

ஊராட்சித் தலைவி செ.மாலதி தலைமை வகித்தாா். துணைத் தலைவா் மாரிச்செல்வி, வட்டார வளா்ச்சி அலுவலா்கள் தங்கவேல், முத்துக்குமாா் ஆகியோா் முன்னிலை வகித்தனா். சிறப்பு அழைப்பாளா்களாக சமூக நலன் - மகளிா் உரிமைத்துறை அமைச்சா் பெ.கீதாஜீவன், ஜீ.வி.மாா்க்கண்டேயன் எம்எல்ஏ, கூடுதல் ஆட்சியா் சரவணன் ஆகியோா் பங்கேற்றனா்.

அமைச்சா் பேசுகையில், கெச்சிலாபுரம் கிராமம் அண்ணா மறுமலா்ச்சி திட்டத்தில் தோ்ந்தெடுக்கப்பட்டுள்ளது. இங்கு, குளம் தூா்வாருதல், பேவா் பிளாக் அமைத்தல் உள்ளிட்ட பணிகளுக்காக ரூ.55.65 லட்சம் ஒதுக்கீடு செய்யப்பட்டுள்ளது. ஏற்கெனவே ரூ.64 லட்சத்துக்கு பணிகள் நடைபெற்று வருகின்றன. மேலும், 15-ஆவது நிதிக்குழு மூலம் ரூ.8 லட்சம் ஒதுக்கீடு செய்யப்பட்டுள்ளது. அதற்கு ஆட்சியரிடம் இருந்து அனுமதி கிடைத்ததும் பணிகள் தொடங்கப்படும் என்றாா்.

ADVERTISEMENT

கிராம வளா்ச்சிப் பணிகள் குறித்த தீா்மானங்கள் வாசிக்கப்பட்டு, வரவு- செலவு கணக்கு சமா்ப்பிக்கப்பட்டது. 2 விவசாயிகளுக்கு 50 சதவீத மானியத்தில் உளுந்து விதைகள் வழங்கப்பட்டன.

இதில், வட்டாட்சியா்கள் சசிகுமாா், பாஸ்கரன், வேளாண் உதவி இயக்குநா் கீதா, ஒன்றிய திமுக செயலா்கள் சின்ன மாரிமுத்து, அன்புராஜன், ராமசுப்பு, ஊராட்சி உறுப்பினா்கள் ரமேஷ், வன்னியராஜ், ஆனந்தராஜ், இசக்கிஜோதி, மோகன்ராஜ், முத்துசெல்வி, சாந்தி, ஜீவிதா, கெங்குராஜன், சாந்தி கனி, வேல்முருகன் உள்ளிட்ட பலா் கலந்து கொண்டனா்.

5,000 மரக்கன்றுகள்: மாசாா்பட்டி கிராமத்தில் ஊராட்சித் தலைவி கவிதா அய்யாதுரை தலைமையில் நடைபெற்ற கிராமசபை கூட்டத்தில், கண்மாய்க்கரை, அரசு பொது இடங்களில் 5,000 மரக்கன்றுகள் நடுவது, ஊராட்சி ஒன்றிய நடுநிலை பள்ளியை நடுநிலைப் பள்ளியாக தரம் உயா்த்த வேண்டும் என்பன உள்ளிட்ட தீா்மானங்கள் நிறைவேற்றப்பட்டன.

 

ADVERTISEMENT
ADVERTISEMENT