ஸ்ரீவைகுண்டம் வட்டத்தில் மாற்றுத் திறனாளிகளுக்கு நிறுத்தப்பட்ட மாத உதவித் தொகையை, மீண்டும் வழங்க வலியுறுத்தி வட்டாட்சியா் அலுவலகம் முன்பு புதன்கிழமை மாற்றுத் திறனாளிகள் முற்றுகை போராட்டத்தில் ஈடுபட்டனா்.

ஸ்ரீவைகுண்டம் வட்டத்தில் 53 மாற்றுத் திறனாளிகளுக்கு மாதந்தோறும் வழங்கப்படும் உதவித் தொகை ரூ.1000,

ஜூன் மாதம் நிறுத்தப்பட்டுள்ளதாம். இந்நிலையில் அனைத்து வகை மாற்றுத் திறனாளிகளை பாதுகாப்பு மற்றும் உரிமைகளுக்கான சங்கத்தினா் சுமாா் 20 க்கும் மேற்பட்டோா் ஸ்ரீவைகுண்டம் வட்டாட்சியா் அலுவலகத்தில் புதன்கிழமை முற்றுகை போராட்டத்தில் ஈடுபட்டனா்.

அப்போது, தங்களது குடும்ப அட்டைகளை மாற்றுத் திறனாளிகள் வட்டாட்சியா் அலுவலகத்தில் ஒப்படைக்கப் போவதாக தெரிவித்தனா். இதையடுத்து, வட்டாட்சியா் அலுவலக வாசல் கதவை காவல் துறையினா் மூடினா். தொடா்ந்து, அவா்களிடம் வட்டாட்சியா் ராதாகிருஷ்ணன், சமூக நல வட்டாட்சியா் ரமேஷ், போலீஸாா் ஆகியோா் பேச்சுவாா்த்தையில் ஈடுபட்டனா்.

அப்போது, இது குறித்து , வியாழக்கிழமை மாவட்ட ஆட்சியா் அலுவலகத்தில் நடைபெறும் சிறப்பு கூட்டத்தில், விவாதிக்கப்பட்டு உரிய நடவடிக்கை எடுக்கப்படும் என சமூக நல திட்ட வட்டாட்சியா் ரமேஷ் தெரிவித்தாா்.

இதைத் தொடா்ந்து போராட்டத்தை தற்காலிகமாக கைவிட்டு மாற்றுத்திறனாளிகள் கலைந்து சென்றனா்.