தூத்துக்குடி

தூத்துக்குடியில் விரைவில் பெண்களுக்கான ஒருங்கிணைந்த சேவை மையம்: அமைச்சா் கீதா ஜீவன்

9th Dec 2022 10:28 PM

ADVERTISEMENT

தூத்துக்குடி மாநகராட்சியில் பெண்களுக்கான 24 மணி நேர ஒருங்கிணைந்த சேவை மையம் விரைவில் அமைக்கப்படும் என்று சமூக நலன் மற்றும் மகளிா் உரிமைத் துறை அமைச்சா் பெ.கீதா ஜீவன் தெரிவித்தாா்.

பணியிடத்தில் பெண்களுக்கு பாலியல் துன்புறுத்தல் குறித்த புகாா் பெட்டியை தூத்துக்குடி தனியாா் நிறுவனத்தில் அமைச்சா் பெ.கீதா ஜீவன் வெள்ளிக்கிழமை அறிமுகப்படுத்தினாா். அதைத் தொடா்ந்து, ‘பெண்ணியம் போற்றுவோம்’ என்ற பெண்கள் பாதுகாப்பிற்கான கையொப்ப பிரசாரத்தைத் தொடக்கி வைத்து அவா் பேசியதாவது:

பெண்களுக்கு எதிரான பாலியல் புகாா்கள், குற்றச் செயல்கள் உள்ளிட்டவை குறித்து விழிப்புணா்வு ஏற்படுத்தும் விதமாக சமூக நலத் துறை சாா்பில் நவம்பா் 25 ஆம் தேதி முதல் டிசம்பா் 10 ஆம் தேதி வரை தமிழகம் முழுவதும் விழிப்புணா்வு நாடகம், பேரணி, பிரசாரம் உள்ளிட்டவை நடத்தப்படுகிறது.

கடந்த 2013 ஆம் ஆண்டில் பெண்களுக்கு எதிரான வன்கொடுமை சட்டம் இயற்றப்பட்டாலும், திமுக ஆட்சி பெறுப்பேற்ற பின்னா் பெண்கள் மற்றும் குழந்தைகளைப் பாதுகாக்கும் வகையில் பல்வேறு சட்டங்கள் அமல்படுத்தப்பட்டுள்ளன. அரசு மற்றும் தனியாா் நிறுவனங்களில் பணிபுரியும் பெண்களுக்கு எதிரான குற்றங்கள் குறித்து புகாா் தெரிவிப்பதற்காக புகாா் பெட்டி வைக்கப்படுகிறது.

ADVERTISEMENT

பணிபுரியும் இடம் பாதுகாப்புடன் இருந்தால் பெண்கள் மன மகிழ்வுடன் பணிபுரியலாம். இச்சட்டத்தைப் பற்றி பெண்கள், குழந்தைகள் உள்ளிட்ட அனைத்துத் தரப்பினரும் தெரிந்து கொள்ள வேண்டும்.

பெண்களுக்கு ஏற்படும் பிரச்னைகள் குறித்து புகாா் தெரிவிக்க ஒருங்கிணைந்த சேவை மையம், தூத்துக்குடி மாநகராட்சியில் விரைவில் செயல்படுத்தப்பட உள்ளது. பெண்களுக்கு ஏற்படும் பிரச்னைகள் குறித்து 181 என்ற கட்டணமில்லா எண்ணில் தெரிவிக்கலாம். இந்த சேவை மையம் மூலம் பெண்களுக்கு ஏற்படும் பிரச்னைகள் குறித்து கலந்து ஆலோசிக்கப்பட்டு பெண்களின் வாழ்க்கைக்கு ஒரு பாலமாகவும், செயல்படும். 24 மணி நேரமும் செயல்படும் இம்மையத்தில் புகாா் அளிப்பவா் குறித்த விவரங்கள் ரகசியமாக வைக்கப்படும் என்றாா்.

மாவட்ட ஆட்சியா் கி.செந்தில்ராஜ், வழக்குரைஞா் ஸ்வா்ணலதா, நிலா சீ புட்ஸ் நிறுவன நிா்வாக இயக்குநா் செல்வின் பிரபு உள்ளிட்ட பலா் பங்கேற்றனா்.

ADVERTISEMENT
ADVERTISEMENT