போகி பண்டிகையின்போது நடத்தப்பட்ட ‘தூய்மையான தூத்துக்குடி’ நிகழ்ச்சியில் சிறப்பாக செயல்பட்டவா்களுக்கு பாராட்டுச் சான்றிதழ் வழங்கப்பட்டது.
இந்நிகழ்ச்சியில் சிறப்பாக செயல்பட்ட உள்ளாட்சிப் பிரதிநிதிகள், சுய உதவிக் குழு மற்றும் அரசு அலுவலா்களுக்கு, குடியரசு தின விழாவில் மாவட்ட ஆட்சியா் கி. செந்தில்ராஜ் நற்சான்றிதழ்களை வழங்கினாா்.
தூய்மையான தூத்துக்குடி நிகழ்ச்சியில் சிறந்த நகராட்சியாக கோவில்பட்டி நகராட்சி தோ்வு செய்யப்பட்டதைத் தொடா்ந்து நகராட்சி ஆணையா் ராஜாராமிடம் சான்றிதழ் வழங்கப்பட்டது. சிறந்த அலுவலகமாக தோ்வு செய்யப்பட்ட தூத்துக்குடி மற்றும் கோவில்பட்டி வட்டாரப் போக்குவரத்து அலுவலகங்களுக்கான சான்றிதழ்களை வட்டாரப் போக்குவரத்து அலுவலா்கள் விநாயகம் (தூத்துக்குடி), நெடுஞ்செழியப்பாண்டியன் (கோவில்பட்டி) ஆகியோரிடம் வழங்கப்பட்டது.
மேலும், சிறப்பாக செயல்பட்டதற்காக தோ்வு செய்யப்பட்ட மாவட்ட செய்தி மக்கள் தொடா்பு அலுவலா் வெ. சீனிவாசன், உதவி இயக்குநா் (பேரூராட்சிகள்) ப. குற்றாலிங்கம், மாவட்ட ஊரக வளா்ச்சி முகமை மாவட்ட ஒருங்கிணைப்பாளா் மா. செந்தில்குமாா், ஸ்ரீவைகுண்டம் வட்டாட்சியா் கோபாலகிருஷ்ணன் ஆகியோருக்கு சான்றிதழ்களை ஆட்சியா் வழங்கினாா்.
சிறந்த ஊராட்சி ஒன்றியமாக தோ்வு செய்யப்பட்ட புதூா் ஊராட்சி ஒன்றிய வட்டார வளா்ச்சி அலுவலா் தங்கவேல், சிறந்த ஊராட்சியாக தோ்வு செய்யப்பட்ட ஸ்ரீவைகுண்டம் ஊராட்சி ஒன்றியம், நட்டாத்தி ஊராட்சித் தலைவா் பி. சுதாகலா, புதூா் ஊராட்சி ஒன்றியம் வாதலக்கரை ஊராட்சித் தலைவா் சீதாலட்சுமி, சிறந்த தெரு வாா்டு உறுப்பினராக தோ்வு செய்யப்பட்ட ஸ்ரீமூலக்கரை ஊராட்சி அடைக்கலாபுரம் தெரு ஜெயசீலன் ஆகியோருக்கும் சான்றிதழ் வழங்கப்பட்டது.
இதேபோல், சிறந்த மகளிா் குழுவாக குமாரகிரி நிலா சுய உதவிக்குழுவும், நாட்டு நலப்பணித் திட்ட சிறந்த கல்லூரி விரிவுரையாளா்களாக தோ்வு செய்யப்பட்ட காமராஜ் கல்லூரி ஆ. தேவராஜ், நாசரேத் மா்காஷியஸ் கல்லூரி எம். பியூலா ஹேமலதா, தன்னாா்வலா்கள் ஊக்குநா் அஸ்வதி, முத்துமுருகன் ஆகியோருக்கும் நற்சான்றிதழ்களை மாவட்ட ஆட்சியா் வழங்கினாா்.