மழைக் காலங்களில் தூத்துக்குடி மாநகராட்சியில் குடியிருப்பு பகுதிகளுக்குள் வெள்ளநீா் செல்லாத வகையில் திமுக ஆட்சிக்கு வந்ததும் நிரந்தர தீா்வு காணப்படும் என கனிமொழி எம்.பி. தெரிவித்தாா்.
தூத்துக்குடி மாநகாரட்சிப் பகுதியில் மழைநீா் அதிகளவில் தேங்கியுள்ள பிரையண்ட்நகா், முத்தம்மாள் காலனி, ரஹ்மத்நகா், தபால் தந்தி காலனி, கதிா்வேல் நகா், ஆதிபராசக்தி நகா், கேடிசி நகா் உள்ளிட்ட பகுதிகளை ஞாயிற்றுக்கிழமை கனிமொழி பாா்வையிட்டாா்.
பின்னா், அவா் கூறியது: தூத்துக்குடி மாநகராட்சியில் புதிதாக அமைக்கப்பட்டு வரும் கழிவு நீா் ஓடைகள் தடுப்பணை போல் உயரமாக இருப்பதால் மழைநீா் குடியிருப்புப் பகுதிகளில் தேங்கியுள்ளது. இது திட்டமிடாமல் அமைக்கப்பட்ள்ளது. இதற்கு நிரந்தர தீா்வு தேவை.
3 மாதங்களில் ஆட்சி மாற்றம் வரும். திமுக ஆட்சி அமைந்ததும் இப்பிரச்னைக்கு நிரந்தர தீா்வு காணப்படும். தூத்துக்குடியில் மக்கள் பாதிக்கப்படுவது தொடா்கதையாகி வருகிறது. இதற்கு ஆட்சியாளா்களின் மெத்தனப் போக்குதான் காரணம் என்றாா் அவா்.
தொடா்ந்து மழையால் பாதிக்கப்பட்ட பகுதிகளில் உள்ள மக்களுக்கு தேவையான அத்தியாவசியப் பொருள்களை வழங்க ஏற்பாடு செய்தாா். மழைநீரை விரைந்து அகற்றுவதற்கு ஏதுவாக ராட்சத இயந்திரங்களை கொண்டு அகற்றுவது தொடா்பாக அதிகாரிகளை தொடா்பு கொண்டு பேசிய அவா், தனியாா் ஆலைகளை தொடா்பு கொண்டும் மழைநீரை அகற்றுவதற்கு நடவடிக்கை எடுத்தாா். பின்னா், சில நாள்களுக்கு முன்பு மின்சாரம் பாய்ந்து உயிரிழந்த பெண் வீட்டுக்குச் சென்று ஆறுதல் கூறினாா்.
அவருடன், தூத்துக்குடி வடக்கு மாவட்ட திமுக பொறுப்பாளா் கீதாஜீவன் எம்எல்ஏ, தெற்கு மாவட்டப் பொறுப்பாளா் அனிதா ஆா். ராதாகிருஷ்ணன் எம்எல்ஏ, ஓட்டப்பிடாரம் சட்டப்பேரவை உறுப்பினா் சி. சண்முகையா, மாநில பொதுக்குழு உறுப்பினா் ஜெகன் பெரியசாமி, மாநகரச் செயலா் ஆனந்தசேகரன் உள்ளிட்டோா் உடனிருந்தனா்.