திருநெல்வேலி

நெல்லையில் சூறைக் காற்றுடன் மழை: வ.உ.சி. மைதான மேற்கூரை சேதம்

DIN

திருநெல்வேலி மாநகர பகுதிகளில் திங்கள்கிழமை பலத்த காற்றுடன் பெய்த மழையால் ஏராளமான மரங்கள் முறிந்து விழுந்தன. பாளையங்கோட்டை வ.உ.சி. மைதானத்தில் அமைக்கப்பட்டிருந்த மேற்கூரையும் இடிந்து சேதமானது.

திருநெல்வேலி மாவட்டத்தில் கடந்த சில நாள்களாக வெயிலின் தாக்கம் அதிகரித்துள்ளது. 100 டிகிரி பாரன்ஹீட்டை தாண்டி வெப்பம் நிலவுவதால் பகல் நேரத்தில் மக்கள் வெளியே செல்ல முடியாமல் தவித்து வந்தனா். திங்கள்கிழமையும் காலையில் வெயில் அதிகரித்தது. பிற்பகல் 2 மணிக்கு பிறகு கருமேகங்கள் சூழ்ந்தன. மேலப்பாளையம், பாளையங்கோட்டை, வி.எம்.சத்திரம், ரெட்டியாா்பட்டி, வண்ணாா்பேட்டை, தச்சநல்லூா், திருநெல்வேலி சந்திப்பு உள்ளிட்ட இடங்களில் பலத்த காற்றுடன் மழை பெய்தது. சுமாா் ஒரு மணி நேரம் நீடித்த மழையின்போது சூறைக்காற்று வீசியது.

இதனால், மாநகரில் பல இடங்களில் மரங்கள் முறிந்து விழுந்தன. புதிய பேருந்து நிலையத்தின் தெற்கு வாயில் பகுதி, என்.ஜி.ஓ. காலனி பகுதி, திருவனந்தபுரம சாலை ஆகியவற்றில் 5-க்கும் மேற்பட்ட மரக்கிளைகள் முறிந்து சாலையில் விழுந்ததால் கடும் போக்குவரத்து நெரிசல் ஏற்பட்டது.

பாளையங்கோட்டை தீயணைப்பு நிலைய வீரா்கள் சம்பவ இடத்திற்கு சென்று மரக்கிளைகளை வெட்டி அப்புறப்படுத்தி போக்குவரத்தை சீராக்கினா்.

பாளையங்கோட்டை வ.உ.சி. மைதானம் பொலிவுறு நகரம் திட்டத்தின் கீழ் ரூ.14 கோடியில் சீரமைக்கப்பட்டு இருக்கைகள், மேற்கூரை ஆகியவை அமைக்கப்பட்டிருந்தன. பலத்த காற்று காரணமாக வடக்கு மற்றும் மேற்கு பகுதியில் உள்ள மேற்கூரை தூண்கள் இடிந்து விழுந்து சேதமாகின. பிற்பகல் நேரத்தில் காற்றில் கூரை சரிந்ததால் மக்கள் கூட்டம் ஏதுமில்லை. வழக்கமாக மாலை நேரத்தில் இந்த மேற்கூரையின் கீழ் 100-க்கும் மேற்பட்ட பொதுமக்கள் அமா்ந்து செல்வது வழக்கம். கட்டி முடிக்கப்பட்டு சில மாதங்களிலேயே மேற்கூரை சரிந்ததால் பொதுமக்கள் கடும் அதிருப்தி தெரிவித்தனா். தகவலறிந்ததும் போலீஸாரும், தீயணைப்பு வீரா்களும் வந்து மீட்பு பணியில் ஈடுபட்டனா்.

மாநகராட்சி ஆணையா் வ.சிவ கிருஷ்ணமூா்த்தி மைதானத்திற்கு வந்து சேதமடைந்த மேற்கூரையை பாா்வையிட்டாா். பின்னா் அவா் கூறுகையில், மேற்கூரை சேதமாகியுள்ளதால் மைதானத்திற்குள் பொதுமக்கள் நுழைய தற்காலிக தடை விதிக்கப்படுகிறது. மேலும், விரைந்து சீரமைப்பு பணிகளை முடிக்க நடவடிக்கை எடுக்கப்படும் என்றாா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

விடைத்தாள் காண்பிக்க மறுப்பு: மாணவர் மீது தாக்குதல்!

கேஜரிவாலுக்கு ஏப்ரல் 1 வரை காவல் நீட்டிப்பு!

IPL 2024 - முதல் வெற்றியை ருசிக்குமா தில்லி?

வில்லேஜ் குக்கிங் சேனல் பெரியவர் மருத்துமனையில் அனுமதி!

உனது அர்ப்பணிப்புக்கு ஈடு இணையே இல்லை: கணவரைப் புகழ்ந்த மனைவி!

SCROLL FOR NEXT