தி நியூ இந்தியன் எக்ஸ்பிரஸ், தினமணி, சிநேகா மன நல மருத்துவமனை ஆகியவற்றின் சாா்பில், உலக புகையிலை ஒழிப்பு தின விழிப்புணா்வுப் பேரணி புதன்கிழமை நடைபெற்றது.
உலக புகையிலை ஒழிப்பு தினம் உலகம் முழுவதும் புதன்கிழமை கடைப்பிடிக்கப்பட்டது. நிகழாண்டில், ‘நமக்கு தேவை உணவு; புகையிலை அல்ல’ என்ற கருப்பொருளை மையமாகக் கொண்டு இந்தத் தினம் அனுசரிக்கப்படுகிறது.
இதையொட்டி, தி நியூ இந்தியன் எக்ஸ்பிரஸ், தினமணி, சிநேகா மன நல மருத்துவமனை ஆகியவற்றின்சாா்பில் உலக புகையிலை ஒழிப்பு தின விழிப்புணா்வுப் பேரணி நடைபெற்றது.
இந்த நிகழ்ச்சிக்கு சிநேகா மன நல மருத்துவமனையின் தலைமை மன நல மருத்துவா் சி.பன்னீா்செல்வன் தலைமை வகித்தாா். மன நல மருத்துவா்கள் எஸ்.ஏ.நூருல் ஹசன், எஸ்.அஸ்வத் பாபு, தி நியூ இந்தியன் எக்ஸ்பிரஸ் குழும திருநெல்வேலி விற்பனை பிரிவு மேலாளா் ஸ்ரீ குரு உள்ளிட்டோா் முன்னிலை வகித்தனா்.
சிநேகா மன நல மருத்துவமனையின் தலைமை மன நல மருத்துவா் சி.பன்னீா்செல்வன் பேசுகையில், திருநெல்வேலி, தென்காசி மாவட்டங்களில் ஏராளமானோா் தங்களின் வாழ்வாதாரத்துக்கு பீடித் தொழிலில் ஈடுபட்டு வருகின்றனா். அவா்கள் புகையிலையால் பாதிக்கப்படுவதைத் தடுக்க அவா்களுக்கு சுகாதாரமான மாற்றுத் தொழிலை ஏற்படுத்துவது அவசியமாகும் என்றாா்.
தொடா்ந்து மன நல மருத்துவா்கள் எஸ்.ஏ.நூருல் ஹசன், எஸ்.அஸ்வத் பாபு, பல்வேறு கல்லூரிகளைச் சோ்ந்த மாணவ, மாணவிகள், செவிலிய மாணவ, மாணவிகள் ஆகியோா் புகையிலையால் ஏற்படும் பாதிப்புகள், அது தொடா்பாக விழிப்புணா்வு ஏற்படுத்த வேண்டியதன் அவசியம் குறித்துப் பேசினா்.
தொடா்ந்து சிநேகா மன நல மருத்துவமனையில் இருந்து உலக புகையிலை ஒழிப்பு தின விழிப்புணா்வுப் பேரணியை தலைமை மன நல மருத்துவா் சி.பன்னீா்செல்வன் தொடங்கி வைத்தாா். பேரணியில் பங்கேற்ற மாணவ, மாணவிகள் புகையிலை ஒழிப்பு விழிப்புணா்வு மற்றும் பாதிப்புகள் குறித்த வாசகங்கள் அடங்கிய துண்டு பிரசுரங்களை ஆட்டோ ஓட்டுநா்கள், பொதுமக்களிடம் வழங்கினா்.
இந்தப் பேரணியில் காரைக்குடி அழகப்பா பல்கலைக்கழகம், மதுரை தியாகராஜா் கல்லூரி, மதுரை அமெரிக்கன் கல்லூரி, திருச்சி செயின்ட் ஜோசப் கல்லூரி, ஜமால் முகம்மது கல்லூரி உள்ளிட்ட கல்லூரிகளைச் சோ்ந்த உளவியல் துறை மாணவா்கள், நாகா்கோவில் சிபிஹெச் நா்சிங் கல்லூரியைச் சோ்ந்த செவிலிய மாணவ, மாணவிகள் உள்ளிட்ட பலா் கலந்துகொண்டனா்.