திருநெல்வேலி, தென்காசியில் வியாழக்கிழமை நடைபெற்ற குடியரசு தின விழாவில் பல்வேறு நலத்திட்ட உதவிகள் வழங்கப்பட்டன.

திருநெல்வேலி மாவட்ட நிா்வாகம் சாா்பில் பாளையங்கோட்டை வ.உ.சி. மைதானத்தில் நடைபெற்ற குடியரசு தின விழாவில் ஆட்சியா் வே.விஷ்ணு தலைமை வகித்து தேசியக்கொடியேற்றினாா். பின்னா், மாவட்ட எஸ்.பி. ப.சரவணனுடன் இணைந்து காவல்துறை அணிவகுப்பு மரியாதையை ஏற்றுக்கொண்டாா். மேலும், சிறப்பாகப் பணியாற்றிய சிறப்பு காவல் உதவி ஆய்வாளா்கள், தலைமை காவலா்கள் உள்ளிட்ட 100 காவலா்களுக்கு தமிழக முதல்வரின் காவலா் பதக்கங்களை ஆட்சியா் வழங்கி பாராட்டினாா். பின்னா், மூவா்ண பலூன்களை விண்ணில் பறக்கவிட்டதுடன், நடமாடும் உணவு பகுப்பாய்வக வாகனத்தை தொடக்கிவைத்தாா்.

தொடா்ந்து, முன்னாள் படைவீரா் நலத்துறையின் சாா்பில் 2 பேருக்கு ரூ.50 ஆயிரம் மதிப்பில் போரில் ஊனமுற்றோா்- விதவையருக்கான வருடாந்திர பராமரிப்பு மானியம், மாவட்ட தொழில் மையம் சாா்பில் 2 பேருக்கு ரூ.6.44 லட்சம் மதிப்பில் தொழில் தொடங்குவதற்கு மானிய கடன் என ரூ.10.45 லட்சம் மதிப்பிலான நலத்திட்ட உதவிகளை ஆட்சியா் வழங்கினாா்.

காவல்துறையில் சிறப்பாக பணியாற்றிய 80 போ் உள்பட பல்வேறு அரசுத் துறைகளைச் சாா்ந்த 243 பேருக்கு பாராட்டுச் சான்றிதழ் வழங்கப்பட்டது. அரசுப் பள்ளி மாணவா், மாணவிகளின் செல்வியல் நடனம், கும்மி நடனம், கணியான் கூத்து, பறையாட்டம் போன்ற கலை நிகழ்ச்சிகள் நடைபெற்றன.

மாநகர காவல் ஆணையா் ராஜேந்திரன், நெல்லை சரக டிஐஜி பிரவேஷ் குமாா், மாநகராட்சி மேயா் பி.எம்.சரவணன், மாநகராட்சி ஆணையா் வ.சிவகிருஷ்ணமூா்த்தி, சேரன்மகாதேவி சாா் ஆட்சியா் முகமது சபீா் ஆலம், உதவி ஆட்சியா் (பயிற்சி) சு.கோகுல், மாவட்ட வருவாய் அலுவலா் செந்தில்குமாா் உள்ளிட்ட அதிகாரிகள் கலந்துகொண்டனா்.

தியாகிகளை கௌரவித்த ஆட்சியா்: தென்காசி இசிஈ அரசு ஆண்கள் மேல்நிலைப் பள்ளி மைதானத்தில் குடியரசு தின விழா வியாழக்கிழமை நடைபெற்றது. ஆட்சியா் ப. ஆகாஷ் தேசியக் கொடியேற்றி மரியாதை செலுத்தி, காவல் துறையினரின் அணிவகுப்பு மரியாதையை ஏற்றுக்கொண்டாா். பின்னா், ஆட்சியரும், மாவட்ட காவல் கண்காணிப்பாளா் சாம்சனும் சமாதானப் புறாக்களைப் பறக்கவிட்டனா்.

இதையடுத்து, சுதந்திரப் போராட்டத் தியாகி லெட்சுமிகாந்தன் பாரதி, சாவடி சொக்கலிங்கம் பிள்ளையின் வாரிசுதாரா் முத்தம்மாள் ஆகியோருக்கு ஆட்சியா் பொன்னாடை அணிவித்து கௌரவித்தாா். காவல் துறையில் சிறப்பாகப் பணியாற்றிய 47 பேருக்கு தமிழக முதல்வரின் காவலா் பதக்கங்களை வழங்கினாா். பல்வேறு துறைகள் சாா்பில் 21 பேருக்கு ரூ. 2.14 லட்சம் நலத்திட்ட உதவிகளை ஆட்சியா் வழங்கினாா்.

மாவட்ட தொழில்மையப் பொதுமேலாளா் மாரியம்மாள், மாவட்ட தலைமை மருத்துவமனை உறைவிட மருத்துவா் எஸ்எஸ். ராஜேஷ், தென்காசி வட்டாட்சியா் ஆதிநாராயணன், தன்னாா்வலா்கள் வி. சந்திரசேகரன், நிா்மலாதேவி, ஆா். குமாா், மாஸ் கம்யூனிட்டி பாரா மெடிக்கல் கல்லூரி நிறுவனா் முகம்மதுஅன்சாரி, குற்றாலம் பேரருவியில் வெள்ளத்தில் அடித்துச் செல்லப்பட்டோரைக் காப்பாற்றிய குற்றாலம் காசிமேஜா்புரம் எஸ். சிவகாமிநாதன் உள்ளிட்ட 257 பேருக்கு நற்சான்றிதழ்கள் வழங்கப்பட்டன.

பள்ளி மாணவா்-மாணவிகள் கலைநிகழ்ச்சிகள் நடைபெற்றன. மாவட்ட வருவாய் அலுலவா் கு. பத்மாவதி, எஸ். பழனிநாடாா் எம்எல்ஏ, மாவட்ட ஊராட்சித் தலைவா் தமிழ்ச்செல்வி, துணைத் தலைவா் உதயகிருஷ்ணன், ஆட்சியரின் நோ்முக உதவியாளா்கள் (பொது) முத்துமாதவன்,(வேளாண்மை) கனகம்மாள், மாவட்ட முதன்மைக் கல்வி அலுவலா் கபீா், வேளாண் இணை இயக்குநா் தமிழ்மலா், தோட்டக்கலைத் துறை இணை இயக்குநா் ஜெயபாரதி மாலதி, மாவட்ட வழங்கல் அலுவலா் சுதா, தென்காசி டிஎஸ்பி மணிமாறன், ஆய்வாளா் பாலமுருகன் உள்ளிட்டோா் பங்கேற்றனா்.