திருநெல்வேலி மாவட்டம் ராதாபுரம் தொகுதியில் நிலவும் குடிநீா்ப் பிரச்னையைத் தீா்க்க வேண்டும் என உள்ளாட்சிப் பிரதிநிதிகள் வலியுறுத்தினா்.

ராதாபுரம் சட்டப் பேரவைத் தொகுதியின் வளா்ச்சிப் பணிகள் குறித்து அனைத்து ஊரக உள்ளாட்சி பிரதிநிதிகள் மற்றும் அரசுத் துறை அதிகாரிகள் பங்கேற்ற

ஆலோசனைக் கூட்டம் கூடங்குளத்தில் உள்ள அணு சங்கமம் மஹாலில் வியாழக்கிழமை நடைபெற்றது. இக் கூட்டத்திற்கு தமிழக சட்டப்பேரவைத் தலைவா் மு.அப்பாவு தலைமை வகித்தாா். மாவட்ட ஆட்சியா் வே.விஷ்ணு முன்னிலை வகித்தாா். மாவட்ட ஊராட்சி தலைவா் வி.எஸ்.ஆா்.ஜெகதீஷ், மாவட்ட ஊராட்சி

உறுப்பினா்கள் ஆவரைகுளம் பாஸ்கா், சாந்தி ரூபா, ராதாபுரம் ஊராட்சி ஒன்றியத் தலைவா் சௌமியா உள்ளிட்டோா் கலந்துகொண்டனா்.

தங்களது பகுதியில் நிறைவேற்ற வேண்டிய திட்டங்கள் குறித்து ஊராட்சி, பேரூராட்சி, ஊராட்சி ஒன்றியங்களின் தலைவா்கள், வாா்டு உறுப்பினா்கள் கருத்துக்களைத் தெரிவித்தனா்.

மாவட்ட ஊராட்சி தலைவா் வி.எஸ்.ஆா்.ஜெகதீஷ் பேசுகையில், ராதாபுரம் தொகுதி முழுவதும் குடிநீா்ப் பிரச்சனையைத் தீா்க்கவும், இளைஞா்களுக்கு வேலைவாய்ப்பை ஏற்படுத்தித் தரவும் நடவடிக்கை எடுக்க வேண்டும் என வலியுறுத்தினாா்.

மக்களின் அடிப்படைத் தேவைகளான குடிநீா், சாலை, தெருவிளக்கு, கழிவுநீா்க் கால்வாய் மற்றும் மழைநீா் வடிகால் வசதிகளை முழுமையாக ஏற்படுத்துவது, நீா்நிலை ஆக்கிரமிப்புகளை அகற்றுவது, கூடங்குளம் அரசு மருத்துவமனையில் புற்றுநோய் சிகிச்சை மையம் திறப்பது, அணுமின் நிலையத்திற்கு நிலம் வழங்கியவா்களுக்கு அரசு வேலை வழங்குவது, கிராம ஊராட்சிகளில் குடிநீா் விநியோக மோட்டாா் இயக்குபவா்களைக் கூடுதலாக நியமிப்பது, பேச்சிப்பாறை அணையிலிருந்து ராதாபுரம் பகுதிக்கு தண்ணீா் திறப்பது, பெரியதாழையை சுற்றுலா தலமாக அறிவிப்பது என்பன உள்ளிட்ட கோரிக்கைகளை நிறைவேற்றுமாறு உள்ளாட்சிப் பிரதிநிதிகள் வலியுறுத்தினா்