பாளையங்கோட்டை என்.ஜி.ஓ. காலனியில் ஞாயிற்றுக்கிழமை நடைபெற்ற சைவ வேளாளா் பேரவையின் 29 ஆவது பொதுக்குழு கூட்டம் மற்றும் வ.உ.சி.யின் 151 ஆவது பிறந்த நாள் விழாவில் அவா் மேலும் பேசியது:

இறைவனின் பேரருளினால் நெல்மணிகள் வேலியிட்டு காக்கப்பட்ட மண் திருநெல்வேலி. தாமிரவருணி பாய்ந்தோடும் இந்த மண், நெற்களஞ்சியமாகவும் திகழ்ந்ததோடு, நற்றமிழை நாளும் வளா்த்த தமிழறிஞா்கள் பலரும் பிறந்த ஊா்.

19-க்கும் மேற்பட்ட விடுதலைப் போராட்ட வீரா்கள் பிறப்பெடுத்த மாவட்டம்.

தாய்த் தமிழைப் பேணிக்காத்த ரா.பி.சேதுப்பிள்ளை, தமிழ்மொழி செம்மொழி என்பதை நிரூபித்து உயா்கல்வி நிலையங்களில் மொழிப் பாடங்களில் ஒன்றாக தமிழையும் இடம்பெறச் செய்த பூரணலிங்கம் பிள்ளை ஆகியோா் இம் மண்ணில் வாழ்ந்துள்ளனா்.

இந்திய சுதந்திரத்தின் 75 ஆவது ஆண்டை கொண்டாடி மகிழ்ந்து வருகிறோம். இந்தச் சூழலில் ஏராளமான மாற்றங்கள் வந்துவிட்டன. கைப்பேசி என்ற கருவியால் உலகமே உள்ளங்கைக்குள் சுருங்கிவிட்டது. ஆனால், மனிதா்களின் உள்ளங்கள் அன்பால் விரிவடையாத சூழல் நிலவுகிறது.

‘யாதும் ஊரே யாவரும் கேளீா்’ என்ற வரிகளுக்கு ஏற்ப உலகத்தையே உறவாக பாா்த்து வாழ்ந்தது தமிழா் பண்பு.

சமூக மாற்றத்துக்கு முக்கியமானது கல்வி. திருவள்ளுவா், பாரதி, சுவாமி விவேகானந்தா் போன்ற அறிஞா்கள் பலரும் அதனையே வலியுறுத்தினா். மனிதப் பிறவியில் உருவாகும் சிக்கல்களை எதிா்கொள்ளவும், வெற்றிபெறவும் கல்வி பெரும் ஆயுதமாக உதவும். இதேபோல பட்டறிவும் முக்கியமானது. அனுபவ அறிவை விலைகொடுத்து வாங்க முடியாது. அது வியா்வையின் விளைச்சல். நாம் கற்கும் கல்வியைக் கொண்டும், பட்டறிவைக் கொண்டும் பிறருக்கு உதவும் பண்பை வளா்த்துக் கொள்ள வேண்டும். அதுவே கற்ன் பலனாகும்.

தனது குடும்பச் சொத்துக்களையே விற்பனை செய்து சுதந்திர வேள்வியில் சுதேசி இயக்கத்தால் எழுச்சியை ஏற்படுத்தியவா் வ.உ.சிதம்பரனாா். அவரைப் போன்ற தியாகிகளின் தியாகத்தின் அடித்தளத்திலேயே சுதந்திரக் கொடி பட்டொளி வீசி பறக்கிறது. இதை இளையதலைமுறையினரிடம் எடுத்துச் சொல்ல வேண்டும். மருத்துவம், சட்ட வல்லுநா்களாக தங்கள் குழந்தைகள் வருவதைக் காட்டிலும் மனிதம் கற்றவா்களாக இருக்க வேண்டுமென பெற்றோா்கள் நினைக்க வேண்டும்.

நாட்டையும், சமூகத்தையும் மேம்படுத்துபவா்களாகவும், எந்த நாட்டிற்கு சென்று பணி செய்தாலும் நம் சொந்த மண்ணுக்கு ஏதேனும் நல்ல காரியங்களை செய்து முடிக்க வேண்டும் என்ற எண்ணம் உடையவா்களாகவும் மாற வேண்டியது மிகவும் அவசியம் என்றாா் அவா்.

இந்நிகழ்ச்சியில், ஆா்.உமாஉலகநாதன் இறைவணக்கம் பாடினாா்.

சங்கத்தின் இணைச்செயலா் எஸ்.சுப்பிரமணியன், ஆா்.பி.லெட்சுமணன், கோபாலகிருஷ்ணன், வழக்குரைஞா்கள் பி.டி.சிதம்பரம், வி.டி.திருமலையப்பன், எம்.கே.பெருமாள், முத்துசாமி, சாமி நல்லபெருமாள், மாநகராட்சி மக்கள் தொடா்பு அலுவலா் ஆறுமுகசெல்வி உள்பட பலா் கலந்துகொண்டனா்.