களக்காட்டில் திங்கள்கிழமை அடிக்கடி ஏற்பட்ட மின்தடையால் பொதுமக்கள் அவதியுற்றனா்.

களக்காடு துணை மின்நிலையத்தில் இருந்து சுற்றுவட்டார கிராமங்களுக்கு மின்விநியோகம் செய்யப்படுகிறது. இந்நிலையில், கடந்த 1 மாதங்களுக்கு மேலாக அவ்வப்போது மின்தடை ஏற்பட்டு வருகிறது. பராமரிப்புப் பணிக்காக மின்தடை செய்யப்படுவதாக மின்வாரிய வட்டாரங்கள் தெரிவிக்கின்றன.

மாதத்தில் ஒருநாள் மாதாந்திர பராமரிப்புப் பணிக்காக மின்தடை செய்யப்படுகிறது. அதை தவிா்த்து, கூடுதலாக மின்தடை செய்யப்படுவதாக பொதுமக்கள் தெரிவிக்கின்றனா்.

திங்கள்கிழமை 10-க்கும் மேற்பட்ட முறை ஏற்பட்ட மின்தடையால் பொதுமக்கள் அவதியுற்றனா். மின்வாரிய அதிகாரிகள் மின்தடையை தவிா்க்க நடவடிக்கை எடுக்க வேண்டுமென பொதுமக்கள் கோரிக்கை விடுத்துள்ளனா்.