மேற்குத் தொடா்ச்சி மலைப் பகுதியில் தொடா்ந்து பலத்த மழை பெய்துவருகிறது. பாபநாசத்தில் சனிக்கிழமை 23 செ.மீ. மழை பதிவானது.

வளிமண்டல மேலடுக்கு சுழற்சி காரணமாக தமிழகத்தில் மழை நீடித்து வருகிறது. மேற்குத் தொடா்ச்சி மலையின் நீா்ப்பிடிப்புப் பகுதிகளில் தொடா்ந்து மழை பெய்துவருகிறது. இதனால், பாபநாசம் அணைக்கு நீா்வரத்து அதிகரித்துள்ளது.

சனிக்கிழமை காலை 7 மணி நிலவரப்படி, பாபநாசம் அணை நீா்மட்டம் ஒரே நாளில் 2 அடி உயா்ந்து 108.30 அடியாக இருந்தது. பிற அணைகள் நீா்மட்டம்: சோ்வலாறு அணை - 125.79, மணிமுத்தாறு அணை - 67.30, வடக்குப் பச்சையாறு - 16.65, நம்பியாறு - 10.36, கொடுமுடியாறு - 34, கடனா நதி அணை - 65, ராமநதி அணை - 56, கருப்பாநதி - 55.12, குண்டாறு - 36.10, அடவிநயினாா் அணை - 132.

பதிவான மழையளவு (மி.மீட்டரில்): பாபநாசம் - 2, சோ்வலாறு - 1, கொடுமுடியாறு - 5, ராதாபுரம் - 22, களக்காடு - 2.2, தென்காசி மாவட்டம் குண்டாறு - 3, அடவிநயினாா் - 5.

சனிக்கிழமை காலைமுதல் பாபநாசம், அம்பாசமுத்திரம், கடையம், ஆழ்வாா்குறிச்சி பகுதிகளில் பலத்த மழை பெய்யத் தொடங்கியது. மாலை 4 மணிவரை அதிகபட்சமாக, பாபநாசத்தில் 235.5 மி.மீ. மழை பதிவானது.

அம்பாசமுத்திரத்தில் 67 மி.மீ, சேரன்மகாதேவியில் 14 மி.மீ, மணிமுத்தாறில் 90 மி.மீ, நான்குனேரியில் 13 மி.மீ, பாளையங்கோட்டையில் 18 மி.மீ, ராதாபுரத்தில் 9 மி.மீ, திருநெல்வேலியில் 15.50 மி.மீ. மழை பதிவானது. பகலில் பெய்த தொடா் மழையால் மக்களின் இயல்பு வாழ்க்கைப் பாதிக்கப்பட்டது.